ولودمیر زیلینسکي د کیف پر متحدینو غږ کړی چې له پیکنګ څخه وضاحت وغواړي او عکس العمل څرګند کړي.
ولسمشر زیلینسکي د اپریل په اتمه نیټه په خپل ټیلیګرام چینل کې په یوه پیغام کې ادعا وکړه چې دوه چینایي اتباع د یوې نښتې په ترڅ کې نیول شوي دي.
د هغه په وینا، څو نور چینایي سرتیري هم په دې شخړه کې ښکیل وو، چې ټول یې د دونیڅک په سیمه کې د روسانو په ملاتړ جنګیدل.
د ۲۰۲۲ کال په فبروري کې پر اوکراین د روسیې د بشپړ یرغل له پیل راهیسې، پیکنګ د روسیې نژدې متحد پاتې شوی دی.
خو پیکنګ په دې جګړه کې ځان بې طرفه ښودلی او د دې جګړې د پای ته رسولو لپاره یې د سولې پلانونه هم وړاندې کړې دي.
چین په دې جګړه کې له کریملین سره په مستقیم ډول یا په عام ډول مرسته نه ده کړې.
د فبروري په میاشت کې په یوه ځانګړي راپور کې، د ازادې اروپا/ازادي راډیو د روسیې د دفاع وزارت د افشا شویو اطلاعاتو له مخې یو چینایی تشخیص کړ چې د روسانو په ګټه یې د اکراین په جګړه کې برخه اخیتسې وه، خو په دې برخه کې نور جزییات نه و ورکړل شوي.
زیلینسکي په ټیلیګرام کې وویل: موږ د دې بندیانو اسناد، د دوی بانکي کارتونه او شخصي معلومات لرو..
له دې پیغام سره یوځای، د اوکراین ولسمشر د هغه چینایي سرتیري عکسونه هم خپاره کړل چې ادعا کیږي نیول شوی دی.
د چین د بهرنیو چارو وزارت تر اوسه د ولادیمیر زیلینسکي ادعا ته په عامه توګه ځواب نه دی ورکړی.
ښاغلي زیلینسکي نور جزییات نه دې ورکړي او نه یې دا خبره توضیح کړې چې د دې نیول شویو چینایانو قومانده د چا په لاس کې وه.
د امریکا د بهرنیو چارو وزارت ویاندې ټامي بروس په اوکراین کې د چینایي سرتیرو د نیول کیدو راپور ته اندیښنه ښکاره کړه.
هغې زیاته کړه چې چین د اوکراین پر وړاندې په جګړه کې د روسیې د ملاتړ یو له اصلي عواملو څخه دی.
زیلینسکي وایي چې لومړني استخباراتي معلومات ښیي چې په اوکراین کې د روسیې په پوځي واحدونو کې د چینایي اتباعو شمیر زیات دی.
د هغه په وینا، د اوکراین امنیتي څانګه (SBU) او اړوند پوځي واحدونه په فعالانه توګه په دې پسې دي چې په جګړه کې د چین د ښکیلتیا کچه معلومه کړي او پوه شي چې تر څه بریده ده.