تمه ده چې د امریکا د بهرنیو چارو وزیر مارکو روبیو د سهشنبې په ورځ له اوکرایني چارواکو سره په جده کې خبرې وکړي.
که څه هم زیلینسکي به پخپله د دې مذاکراتو برخه نه وي، خو د هغه ټیم به هڅه وکړي هغه ترینګلتیا ترمیم کړي چې واشنګټن ته د زیلینسکي د وروستي سفر پر مهال په سپینه ماڼۍ کې د ولسمشر ټرمپ او د هغه له مرستیال جي ډي وینس، سره د لفظي شخړې له امله رامنځته شوه.
له اوکراین سره د روسیې د څرګند تیري په وړاندې د مقابلې لپاره د امریکا د استخباراتي او نظامي مرستو دوام د دې خبرو اترو یو مهم بحث دی.
د سعودي دولتي تلویزیون د زیلینسکي د جدې ته د رسېدو خبر ورکړی، او ټاکل شوې ده چې د اوکراین او امریکا ترمنځ مذاکرات همدلته وشي.
په عین حال کې د امریکا د بهرنیو چارو وزیر مارکو روبیو هم سعودی عربستان ته تللی چیرې چې به نن له سعودي ولیعهد محمد بن سلمان سره وګوري.
د اسوشیېټیډ پرېس د راپور له مخې، داسې نه ښکاري چې زیلینسکي او روبیو به له یو بل سره وګوري.
زیلینسکي ویلي، د اوکراین مذاکره کوونکی پلاوی به د ولسمشرۍ ماڼۍ د دفتر مشر اندري یرماک، د بهرنیو چارو وزیر اندري سیبیها، او د دفاع وزیر رستم عمروف، په مشرۍ د سهشنبې په ورځ له امریکايي لوري سره خبرې وکړي.
د امریکا د مذاکره کوونکي ټیم مشري به د بهرنیو چارو وزیر مارکو روبیو کوي.
که چیرې دواړه خواوې په دې مذاکراتو کې یوې هوکړې ته ورسېږي، د امریکا حکومت به پر اوکراین او روسیې د سولې د خبرو د پیل لپاره خپل فشار زیات کړي.
خو د اروپایي هېوادونو چارواکي په دې مذاکراتو شک لري، ځکه چې دوی پخپله پکې ګډون نه لري.
اروپایي ټولنې تېره اوونۍ پرېکړه وکړه چې د ټرمپ د ادارې د دریځ بدلون ته په غبرګون کې د اروپا دفاعي سیستم پیاوړی کړي او د امنیت لپاره سلګونه میلیارد یورو ځانګړي کړي.
په ورته وخت کې، ولسمشر ډونالډ ټرمپ د دې مذاکراتو په اړه خوشبیني ښودلې او خبریالانو ته یې ویلي: "زه فکر کوم چې دا اوونۍ به ډېر پرمختګ وشي."
زیلینسکي هم له سعودي ته د تګ وړاندې ویلي: "زه به د سولې د ترلاسه کولو لپاره خپلو هڅو ته دوام ورکړم."
