د اسوشیتید پریس خبري آژانس د راپورله مخې د دریو خوشې شویو اسراییلي یرغملو عمرونه ۵۶، ۵۲ او۳۴ کاله ښودل شوي او ویل شوي چې درې واړه د ۲۰۲۳ کال د اوکتوبرپراومه پراسراییل د حماس د برید په مهال یرغمل شوي وو.
د ۲۰۲۳ کال د اکتوبر په اوومه د اسراییل پر قلمرو د حماس په برید کې شاوخوا ۱۲۰۰ کسان ووژل شول او شاوخوا ۲۵۰ تنه نور حماس یرغمل کړل. دا په غزه کې د جنوري په نولسمه د نافذ شوي اوربند له مخې د یرغملو او بندیانو د تبادلې پنځم پړاو دی.
له دې مخکې په تېرو پړاوونو کې اتلس یرغمل او له ۵۵۰ زیات فلسطیني بندیان خوشې شوي دي.
دې اوربند چې د قطر، مصر او متحدو ایالتونو د مرکچیانو د هڅو پرمټ ټینګ شوی، په غزه کې پنځلس میاشتنۍ جګړه درولې ده. د غزې د روغتیا وزارت په وینا د اسراییل په غچ اخیستونکو بریدونو کې له ۴۷۰۰۰ څخه زیات فلسطینیان وژل شوي چې له نیمایي ډیر یې ښځې او ماشومان دي.
د اسراییلي یرغملو ناړه وضعیت
حماس ډلې چې متحدایالات او اروپايي ټولنه یې تروریستي ډله بولي، نن د ورځې په پیل کې دا درې اسراییلي یرغمل، نړیوال سره صلیب ته له سپارلو مخکې په غزه کې د سلګونه کسانو په وړاندې په عام محضرکې راڅرګند کړل.
درې واړه یرغمل چې د وسله والو له خوا محاصره شوي و، ډنګر او ډیر کمزوري ښکارېدل. د اسراییل ولسمشر اسحاق هرزوګ وویل چې یرغمل شویو ۴۹۱ ورځې په دوزخ، لوږه، کمزوري او درد کې تیرې کړې دي.
د اسراییل د صدراعظم بنیامین نتنیاهو دفتر پر هغې بڼې چې دغه یرغمل خوشې شوي، انتقاد کړی او ویلي یې دي چې دوی ته هغه حیرانونکې صحنې د منلو نه دي چې د شنبې په ورځ ښودل شوي. دې دفتر په یوه بیان کې نه دي ویلي چې په وړاندې به یې څه ډول اقدام وکړي خو د یرغملو د خوشې کیدو پخوانیو پړاوونو ته په پام چې له ګډوډۍ سره مله و، د دې سبب شوي وو چې په څو مواردو کې د فلسطیني بندیانو د خوشې کیدو بهیر وځنډیږي.
د اسیرانو د تبادلې د بل پړاو لپاره تیارۍ
د فرانسپرس خبري آژانس د راپور له مخې د اسراییل د صدراعظم دفتر نن د یرغملو له خلاصون وروسته وویل چې یو پلاوی به د اوربند د بل پړاو د عملي کیدو پرلارو چارو د خبرو لپاره دوحې ته لاړشي.
د اوربند په دوهم پړاو کې به د اسراییل له زندانونو د نورو فلسطیني بندیانو او د حماس ډلې له خوا د نورو اسراییلي یرغملو د خوشې کیدو ډاډ ترلاسه کیږي او هم به په غزه کې په پشپړ ډول د جګړو د پای ته رسولو لپاره لاره پرانستل شي.
د چارو یوشمیر څارونکو د امریکا د متحده ایالاتو د ولسمشر ډونالډ ټرمپ وروستیو څرګندونو ته په پام چې ویلي یې دي د غزې اوسیدونکي دي نورو هیوادونو ته ولیږدول شي، په غزه کې د دې نازک اوربند د دوام په اړه اندیښنه ښکاره کړې وه.