د عربي هېوادونو په ګډه اعلامیه کې راغلي چې دا ډول پلانونه "سیمهییز ثبات ګواښي، د شخړو د پراخېدو خطر زیاتوي، او د ملتونو ترمنځ د سولې او ګډ ژوند لرلید اغېزمنوي."
دا بیان په قاهره کې د مصر، اردن، سعودي عربستان، متحده عربي اماراتو او قطر د بهرنیو چارو وزیرانو له غونډې وروسته خپور شو. په دې غونډه کې د فلسطین لوړپوړی چارواکی حسن الشیخ، چې له اسراییلو سره د اړیکو مسوول دی، او د عرب ټولنې سرمنشي احمد ابوالغیط هم حضور درلود.
دا غونډه وروسته له هغه شوې چې د امریکا پخواني ولسمشر ډونالډ ټرمپ د غزې له تړانګې څخه مصر او اردن ته د فلسطینیانو د لېږدولو وړاندیز وکړ.
عربي هېوادونو د دې وړاندیز د ردولو په ترڅ کې ټینګار کړی چې دوی د ډونالډ ټرمپ له ادارې سره د "دوه دولتونو د حل لارې پر بنسټ په منځني ختیځ کې د عادلانه او جامع سولې د ترلاسه کولو" لپاره همکارۍ ته چمتو دي.
دوی همدارنګه په نړیواله ټولنه غږ وکړ چې د غزې د بیارغونې لپاره پلان جوړ کړي، ترڅو فلسطینیان په خپله خاوره کې پاتې شي.
د جنورۍ په ۲۶مه د امریکا ولسمشر ډونالډ ټرمپ د غزې په تړانګه کې "ګډوډ حالت" ته په اشارې، خبریالانو ته وویل چې اردن او مصر باید د ډېرو فلسطینیانو کوربه توب وکړي.
د ښاغلي ټرمپ په وینا، د غزې د ۲.۳ میلیونه نفوس د اکثریت بیا مېشتېدنه ممکن لنډمهاله یا دایمي وي. د ټرمپ دا وړاندیز او نظر د جګړې په لومړیو کې ځینو اسراییلي چارواکو هم ورکړی و.
د اردن او مصر چارواکو له دې وړاندیز سره مخالفت څرګند کړ.
د مصر د بهرنیو چارو وزارت په اعلامیه کې ټینګار شوی چې دوی د فلسطینیانو د حقونو د هر ډول نقض سره، چې پکې د هغوی موقتي یا دایمي بېځایه کېدل هم راځي، مخالف دي.
د مصر ولسمشر عبدالفتاح السیسي تېره اونۍ په یوه خبري غونډه کې د فلسطینیانو د لېږدولو په اړه د ډونالډ ټرمپ د نظر مخالفت وکړ او دا نظر یې "د نه زغملو " وباله.
د اردن د بهرنیو چارو وزیر ایمن صفادي هم وویل چې د فلسطینیانو د بېځایه کیدو سره په مخالفت کې یې "قاطع او نه بدلیدونکی دریځ" دی.
مصر دا خبرداری هم ورکړی چې د غزې سره په پوله، سینا ټاپووزمې ته د فلسطینیانو ډلهییزه لېږد به خطرناکې امنیتي پایلې ولري.
اوسمهال، اردن له دوو میلیونو څخه د زیاتو فلسطینیانو کوربه دی.
