دا باغ شاوخوا لس کاله وړاندې د "افکو" کمپنۍ له لوري په ۱۵۴ جریبه ځمکه جوړ شوی او شاوخوا ۶۰ زره د زیتونو ونې لري. هر کال د دې باغ حاصلات ډېرېږي، خو د پروسس لپاره د فابریکې نشتوالی یې یوه جدي ستونزه ده.
د کروندګرو اندېښنې
د باغ یو کروندګر، نورعلي، وايي چې د کندهار اقلیم د زیتونو لپاره ډېر مناسب دی. هغه زیاتوي چې که کروندګر دې کښت ته مخه کړي، د نورو کښتونو پرتله به ډېره ګټه وکړي. د نوموړي په وینا، سږکال به دوی له دې باغ څخه ۲۵ ټنه زیتون ترلاسه کړي، چې د پروسږکال پرتله څو چنده زیات دي.
نورعلي وایي:
"موږ په دې باغ کې شاوخوا شپېته زره نیالګي لرو. زموږ لویه ستونزه د اوبو کمښت دی. که خلک د زیتونو باغونه جوړ کړي، ډېره ګټه به وکړي، ځکه چې حاصل یې ښه دی او بازار کې یې بیه لوړه ده. هر کیلو په ۶۰۰ افغانۍ پلورو."
د پروسس لوړ لګښتونه
د باغ مسوول حسن مبارک وايي چې د زیتونو حاصلات هر کال د پروسس لپاره ننګرهار ته لېږدوي، خو د انتقال او پروسس لوړ لګښتونه یې لویه ستونزه ده.
حسن مبارک زیاتوي:
"په کندهار کې باید د زیتون باغونه ترویج شي. موږ زیتون د پروسس لپاره جلال اباد ته وړو، چې دا زموږ لپاره ډېر سخت تمامیږي. حکومت باید د پروسس لپاره فابریکې جوړې کړي."
د کندهار د کرنې ریاست مسوولین وايي چې په دې ولایت کې دا مهال یوازې یو لوی زیتون باغ او څو کوچني باغونه شته، چې ټول ټال یې ځمکه ۱۶۰ جریبه ده.
د دوی په وینا، د زیتونو نړیوال بازار په دوامداره توګه وده کوي، او د دې مېوې روغتیايي او اقتصادي ګټې بېسارې دي.
که په کندهار کې د زیتونو د پروسس لپاره فابریکه جوړه شي، نو دا به نه یوازې د کندهار اقتصاد پیاوړی کړي، بلکې نورو کروندګرو ته به هم د زیتونو د کرنې لپاره انګیزه ورکړي.
