داسې مهال چې اسراییل په غزه کې د حماس ډلې د ځپلو عملیاتو ته دوام ورکوي، په سیمه کې د غزې د بېځایه شویو خلکو پر مخ ټولې لارې بندې شوې دي.
پهداسې حال کې چې اسراییلي ځواکونه د حماس ډلې د ځپلو لپاره عملیاتو ته دوام ورکوي او د فلسطیني چارواکو په وینا پهدې ترڅ کې ۱۷ کسان وژل شوي د غزې له جګړو بېځایه شوي فلسطینیان ډلې ډلې په ساحلي سیمو کې خوندي ځایونو ته روان دي.
له بلې خوا د مصر په پلازمېنه قاهره کې د اوربند په اړه خبرې روانې دي، خو پهدې خبرو کې د جګړې د پای ته رسېدو په صورت کې د غزې په تړانګه کې پر دوو اساسي دهليزونو د ولکې په ګډون د مهمو اختلافي مسایلو په اړه د پرمختګ ډېرې لږې نښې لیدل کېږي.
اسراییلو پهدې وروستیو کې په غزه کې د جګړې له سیمو د ملکي وګړو د ایستلو څو فرمانونه ورکړي، چې د فلسطینیانو، ملګروملتونو او مرستندویو موسسو انتقادونه یې پارولي دي.
دا انتقادونه تر ډېره پردې دي چې د بشري مرستو ساحې کمې شوي او خوندي ځایونه نهشته.
بېځایه شوې کورنۍ چې په جنوبي خان یونس او مرکزي دیر البلاح ښارونو کې یې پناه اخیستې ده، وايي چې دوی د سمندر په غاړه په ځای پر ځای شویو خېمو کې ژوند کولو ته اړ شوي دي.
د غزې روغتیايي چارواکو ویلي، د اسراییلي پوځ په حملو کې د غزې په تاریخې ولسوالیو بوریج Bureij او مغازي Maghazi کې نهه کسان، په خان یونس کې پنځه او په رفح کې درې کسان وژل شوي دي.
دا جګړه د اکتوبر په اوومه وروسته له هغه پیل شوه چې حماس ډلې د اسراییل پر قلمرو برید وکړ، نژدې ۱۲۰۰ کسان یې ووژل او ۲۵۰ نور یې برمته کړل.
د جګړې له پیلېدو وروسته د اسراییلو په حملو کې د غزې د روغتیايي چارواکو په وینا له ۴۰۴۰۰ زیات فلسطینيان وژل شوي دي او د غزې د ټولو ۲،۳ میلیون وګړو ډېره برخه څو څو ځلې بېځایه شوي دي.
مرستندویې ټولنې وايي، د غزې اوسېدونکي د خوړو او درملو له جدي کمښت سره مخامخ دي.
دا جګړه د اکتوبر په اوومه وروسته له هغه پیل شوه چې حماس ډلې د اسراییل پر قلمرو برید وکړ، نژدې ۱۲۰۰ کسان یې ووژل او ۲۵۰ نور یې برمته کړل.
بلخوا ملګروملتونو په غزه کې خپل فعالیت پرون وروسته له هغه وځنډاوه، چې اسراییلو د یکشنبې په ورځ په دیر البلاح کې چې د دې سازمان د فعالیتونو مرکز دی خلکو ته له خپلو مېنو د وتلو نوی فرمان ورکړ.
د ملګروملتونو د یوه چارواکي په وینا اسراییلو دا فرمان هغه مهال ورکړ چې، ملګروملتونو په غزه کې د ماشومانو د ګوزڼ د ناروغۍ یا پولیو پر ضد د نژدې شپږنیم لکه ماشومانو د واکسین کمپاین ته تیاري نیوله.
داسې مهال چې جګړې روانې دي د بېلابېلو اړخونو مرکچیان په غزه کې د اوربند او د اسراییلو له زندانونو د فلسطیني بندیانو په بدل کې د ۱۰۹ اسراییلي او بهرنیو برمتهو د خلاصون لپاره په قاهره کې خپلو خبرو ته دوام ورکوي.
که څه هم د امريکا متحدهایالات مصر او قطر چې د اوربند د خبرو منځګړتوب کوي، د دې هڅو بریا ته هیلهمن دي، خو حماس او اسراییل په خبرو کې د پرمختګ پر وړاندې د خنډونو د جوړولو پړه پر یو بل اچوي.
د امريکا متحدهایالات او اروپايي ټولنه حماس تروریستي ډله بولي.
