راپورونه وايي چې د بغلان ولایت په ځینو سیمو کې تازه سېلونو لږترلږه پنځوس کسان چې ډېری ښځې او ماشومان دي وژلي دي.
په بغلان کې د طبیعي پېښو پرضد د مبارزې رییس هدایت الله همدرد رسنیو ته په یوه غږیز پیغام کې د مرکزي بغلان د ولسوالۍ د روغتون د چارواکو په حواله تردې دمه د پنځوسو کسانو مړینه تایید کړې ده:
" د بغلان مرکزي روغتون موږ ته تایید کړې چې پنځوسو مړي یې ترلاسه کړي. البته دا ارقام لومړني دي. ښايي د شهیدانو شمېر لوړ شي. په برکې ولسوالۍ، په پلخمري ښار او په دهنه غوري ولسوالۍ کې هم شهیدان لرو."
نوموړي ویلي دي چې دا سېلونه له درنو بارانونو وروسته ناڅاپه راووتل ځکه نو خلکو تیاری نه ورته درلوده.
همدرد زیاتوي چې د بېړنیو چارو مسوول چارواکي د طالبانو د پوځ او پولیسو په مرسته د احتمالي مړیو د موندلو لپاره د عملیاتو په حال کې دي.
په عین حال کې په بدخشان ولایت کې هم د طالبانو سیمه ایز چارواکي وايي چې پرونیو سېلونو په تِشکان، تګاب، کوهستان، یاوان او وردوج ولسوالیو کې مالي زیانونه اړولي دي. د بدخشان د طبیعي پېښو پرضد د مبارزې رییس محمداکرم اکبري په دې اړه آزادۍ راډیو ته وویل:
" موږ دلته لوی انساني تلفات نه لرو. یوازې دوه تنه په تِشکان ولسوالۍ کې تري تم دي او په کوهستان ولسوالۍ کې یوتن شهید دی. خو د څارویو، د بریښنا د بندونو او کورونو د ویجاړېدو په څېر مالی زیانونه خورا زیات دي."
د طالبانو د حکومت ویاند ذبیح الله مجاهد بېګا ناوخته پر خپله ایکس پاڼه په یوه بیان کې په بغلان، بدخشان، غور او هرات ولایتونو کې د سلګونه کسانو د مړینې او ټپي کېدو، د سلګونه کورونو د ویجاړېدو او د پراخو مالي زیانونو خبر ورکړی خو ښاغلي مجاهد د مړو او ټپيانو دقیق شمېر نه دی ښودلی.
له بلې خوا د طالبانو د حکومت د هواپېژندنې ادارې اټکل کړی چې نن هم ښايي د هېواد په ځینو ولایتونو کې درانه بارانونه وشي چې تالنده او بریښنا او سخت بادونه به هم ورسره وي.
د وري د میاشتې له وروستیو څخه د افغانستان په لسو ولایتو کې له سلو ډېر کسان د سېلابونو په نتیجه کې مړه شوي دي او ترڅنګ یې پراخې کرنیزې ځمکې ویجاړې شوي او سلګونه څاروي له منځه تللي دي، په داسې حال کې چې د ډېری افغانانو اقتصاد په کرنه او مالدارۍ ولاړ دی.
افغانستان د ملګروملتونو د معلوماتو له مخې د اقلیمي بدلون د زیانونو له پلوه د نړۍ د زیانګالو هېوادونو په فهرست کې شپږم ځای لري.
