امریکایي رسنیو د متحده ایالتونو د حکومتي چارواکو په حواله راپور ورکړی چې اسراییلو په ایران برید پیل کړی دی.
دا برید د هغو توغندیزو او ډرون بریدونو په غچ کې شوی چې تېره اوونۍ ایران په اسراییل وکړې.
د ایران دولتي رسنیو ویلي، نن جمعه سهار وختي د اصفهان مرکزي ښار ته څېرمه د چاودنو غږونه اورېدل شوي دي.
امریکايي رسنیو له هغې ډلې سيایناین او نورو ځینو ټولنیزو شبکو کې ویډیوګانې لاس په لاس کېږي چې اصفهان ته نږدې لویې چاودنې ښيي.
د ایران دولتي خبري اژانس ایرنا بیا د اصفهان په یوه لویه هوايي اډه کې د دافع هوا د سیستمونو د ډزو خبر ورکړی دی.
اصفهان کې د ایران یو شمېر اټومي تاسیسات موجود دي چې تر ټولو مهم یې ځمکې لاندې نطنز اټومي بټۍ او د یورانیمو د بډاینې مرکز دی.
ایراني چارواکو جزییات نه دي ورکړي او په خپلواکه توګه دا خبره د تایید وړ نه ده چې اسراییلو برید کړی که څنګه.
د ایران دولتي تلوېزیون راپور ورکړی چې په څو ښارونو کې د هوايي دفاع سیستمونو ډزې کړي دي.
تر دې دمه له پلازمېنې تهرانه کوم چارواکي د نننیو تحولاتو په تړاو تبصره نه ده کړې.
د اټومي انرژۍ نړیوالې ادارې (IAEA) ویلي چې د ایران اټومي تاسیساتو ته کوم زیان نه دی رسېدلی.
د دې اوونۍ په پیل کې، داسې ګنګوسې وې چې که اسراییل په ایران کې دننه برید وکړي، دا سایټونه ممکن هدف وي.
اخوا په سوریه کې هم نن د بریدونو خبر ورکړی شوی دی.
د فرانسې خبري اژانس د راپور په اساس په بریتانیا کې مېشته د سوریې د بشري حقونو د څار ادارې مشر رامي عبدالرحمن ویلي چې اسراییلو نن د سوریې د پوځ د رادار سیستم د سویدا او درعا ولایتونو ترمنځ په نښه کړی دی.
تهران د اپرېل د ١۴مې په سهار وختي په اسرایيلو باندې تر ٣٠٠ زيات بې پيلوټه الوتکې او توغندي وتوغول چې تقريباً ټول يې د اسرایيلو د دفاعي سيستمونو او د امريکا، فرانسې، بريتانيا او اردن د ځواکونو له خوا شنډ کړای شول.
تهران وویل په اسراییلو باندې یې ځکه بریدونه وکړل چې په سوریه کې د ایران پر کنسولګرۍ د اسراییلو د برید په نتیجه کې دوه ایراني جنرالان وژل شوي وو.
