د ملګرو ملتونو د خوړو نړیوال پروګرام د میلیونونو هغو افغانانو پر وضعیت اندېښنه وښوده چې په افغانستان کې نن سبا د خوړو له کموالي سره مخامخ دي.
د ملګرو ملتونو د خوړو نړیوال پروګرام وايي، که څه هم د بشري مرستو له لارې په افغانستان کې د یوې انساني غمیزې مخه نیول شوې، خو د بودیجې د کموالي له کبله ټولو اړو کسانو ته د مرستو رسول ستونزمن شوي دي.
په افغانستان کې د دې ادارې د ارتباطاتو مسوول فلیپ کراپف ازادي راډیو ته وویل چې د خوړو نړیوال پروګرام اړ شو چې په ۲۰۲۳م کال کې په ټول هېواد کې ۱۰ میلیونه کسانو ته د اضطراري مرستو لړۍ بنده کړي او له کبله یې سلګونه زره ښځې او ماشومان له خطر سره مخامخ شي.
هغه زیاته کړه: "دا مهال په افغانستان کې په هرو درېیو کسانو کې یو تن نه پوهېږي چې د بل وخت خواړه له کومه کړي. دا مهال هر ولایت له بحران یا هم د خوړو د نه خوندیتوب له لوړې کچې سره مخامخ دی. زیاتې کورنۍ په ډېرو سختیو کې ژوند کوي. دوی له بد اقتصادي وضعیت، د وزګارتیا له لوړې سطحې سره مخامخ دي او له ناچاۍ د ژوندي پاتې کېدو هڅه کوي او له خپلو وروستیو سرچینو کار اخلي."
په افغانستان کې د ملګرو ملتونو د خوړو نړیوال پروګرام دغه چارواکي ویلي چې له یوه کال راهیسې د بودیجې د کموالي له کبله اوس یوازې کولی شي چې له تر ټولو نهیلو کورنیو سره د خوړو مرستې وکړي.
فلیپ کراپف زیاته کړه، چې د خوړو نړیوال پروګرام په جنورۍ میاشت کې اووه میلیونو کسانو ته د خوړو مرستې او د تغذیې اضطراري مرستې برابرې کړي، حال دا چې د دې شمېر دوه برابر زیات کسان مرستو ته اړ دي.
هغه زیاته کړه چې په راروانو شپږو میاشتو کې د خپلو فعالیتونو د دوام لپاره څه باندې ۷۶۰ میلیون امریکايي ډالرو ته اړتیا لري.
په همدې حال کې په افغانستان کې اړ کسان، له مرستندویو بنسټونو غواړي چې له دوی سره په مستقیم ډول خپلې مرستې شریکې کړي.
د ننګرهار د مولوي خالص فامیلیو اوسېدونکي چې خپل نوم یې نه دی اخیستی، ازادي راډیو ته وویل: "دلته چې کوم د مرستې مواد وېشل کېږي، د کلي ملک ورسره روان وي، د ملک د خپل خپلوانو نوم لیکل کېږي، نورو کسانو ته دا مرستې نه رسېږي."
له ګاونډیو هېوادونو په ځانګړي ډول پاکستانه د نومبر میاشتې له لومړۍ نېټې د بې اسناده افغانانو ډله ییز اخراج په افغانستان کې بشري مرستو ته د اړو کسانو شمېر زیات کړی دی.
ملګرو ملتونو مخکې ویلي وو چې په افغانستان کې څه باندې ۲۹ میلیونه وګړي بشري مرستو ته اړ دي.
د کډوالۍ نړیوال سازمان تېره میلادي میاشت په افغانستان کې د ناوړه بشري وضعیت په باب له اندېښنو سره ویلي وو، په دغه هېواد کې خلک د ژمي تېرولو لپاره کافي امکانات نه لري.
