نن د نړۍ له بېلا بېلو هېوادونو سلګونه زره حاجیان مکې ته نږدې په عرفات کې راټول شوي او له سهاره تر ماښامه به په دعا او عبادت تېروي.
په عرفات کې راټولېدل د حج یو له مهمو ارکانو څخه دي، حاجیان به د لمر لوېدو وروسته دمزدلفې پر لور ځي او سبا چهارشنبه د لوی اختر لومړی ورځ ده.
حاجیان به سبا په کاڼو د شیطانانو د ویشتلو لپاره لاړ شي او قرباني به هم وکړي.
خان محمد نظامي یو له هغو کسانو دی چې سږ کال له لوګر ولایت څخه حج ته تللی دی.
هغه د عرفات له غونډۍ څخه ازادي راډیو سره په خبرو کې وویل: "زه همد اوس د عرفات په سیمه کې د جبل رحمت په نوم په یو لوړ ځای کې یم، ان شالله چې دا د نزول، رحمت او دعا د قبلېدو ځای ده."
سږ کال شاوخوا دېرش زره کسان له افغانستان څخه حج ته تللي دي.
د سږ د حج په مراسمو کې د نړۍ له ۱۶۰ هېوادونو څخه حاجیانو ګډون کړی، چې د راپورونو له مخې یې د کورنیو حاجیانو په ګډون شمېر څه باندې دوه میليونو تنو ته رسېږي.
د سعودي عربستان حکومت د حاجیانو د امنیت او سلامتۍ لپاره ځانګړي او بې سابقې تدابیر نیولي دي.
د راپورنو پر بنسټ، په عربستان کې هوا ډېره ګرمه ده او د تودوخې درجه ۴۴ سانټي ګراډ او رطوبت يې ۱۳ سلنې ته رسېدلی دی.
د شرق الاوسط ورځپانې راپور ورکړی چې د لومړی ځل لپاره د حج په مراسمو کې د مصنوعي ذهانت په مرسته حاجیانو ته ډیجیټلي کارتونه توزیع شوي دي چې د "نسک" په نوم د اپلېکېشن په مرسته حاجیانو ته لارښونه کوي او خدمات ورته وړاندې کوي.
تېر کال د کرونا وبا له امله سعودي عربستان ته د حاجیانو ورتګ محدود شوی و.
په ۲۰۱۵ کال کې د حج په مراسمو کې د ګڼې ګوڼې له کبله ۲۳۰۰ تنه مړه شوي وو.
