د واشنګټن او ریاض په نوښت د سوډان د جګړې د ښکېلو لوریو ترمنځ نن د سعودي عربستان په جدې ښار کې د روغې جوړې خبرې کېږي.
د متحده ایالتونو او سعودي عربستان په نوښت دا خبرې لومړۍ جدي هڅه ده چې د سوډان د دوو پوځي ډلو ترمنځ روانه جګړه به ښايي پای ته ورسوي.
دا جګړه چې د پلازمېنې خرطوم په شمول په ځینو ښارونو کې روانه ده، تر اوسه پهکې په سلګونه ملکیان وژل شوي او په لسګونه زره نور د خپلو کورونو پرېښودو ته مجبوره شوي دي.
ریاض او واشنګټن د سوډان پوځ او د چټک غبرګون ځواکونه مخکې هم هڅولي وو چې خبرې سره وکړي.
د دې دوو ډلو ترمنځ تر اوسه څو ځله د اوربند هڅې شوې دي او بیا بیا دا اوربندونه مات شوي دي.
يادو دوو پوځي ډلو په ښکاره دا خبره کړې ده چې دوی د بشري مرستو د رسولو او د جګړې له سیمو د خلکو د وتلو لپاره اوربند ته چمتو دي، خو د جګړې د پای ته رسولو لپاره یې تر اوسه خبرو ته چمتوالی نهدی ښودلی.
د چټک غبرګون د ځواکونو مشر محمد حمدان دقلو چې په حمیدتي مشهور دی وایي، هیله یې دا ده چې د دې خبرو له لارې دوی خپل هدف ته ورسېږي چې د جګړو له سیمو د ملکیانو وتل دي.
د سوډان پوځ بیا وایي چې دوی د جمعې په ماښام جدې ته خپل استازي واستول، خو دا خبره یې کړې ده چې دوی به د چټک غبرګون ډلې له استازیو سره مخامخ خبرو ته حاضر نهشي.
حمیدتي بیا ویلي، دوی به د پوځ مشر عبدالفتاح البرهان یا ژوندی نیسي او یا به یې وژني.
په سوډان کې جګړه د اپرېل په پنځلسمه وروسته تر دې پیل شوه چې د نړیوالو په ملاتړ د یوه ډیموکراتیک حکومت د جوړېدو لپاره د انتقالي دورې د رامنځته کېدو هڅې ناکامې شوې.
برهان له دوو کلونو راهیسې د پوځي شورا مشري کوي او حمیدتي پخوا د ملېشهوو مشر و.
د سپینې ماڼۍ د ملي امنیت سلاکار جیک سلیوان سعودي عربستان ته د خبرو لپاره تللی دی.
ریاض له برهان او حمیدتي سره نږدې روابط لري، دغو دواړو پخوا سعودي عربستان ته خپل وسلهوال استولي وو چې د ریاض په ګټه په یمن کې د حوثیانو پرضد جګړه وکړي.
ریاض په سرې بحیرې کې چې له سوډان سره پهکې شریک دی امنیت ته اندېښنه لري.
