د خوړو نړیوال پروګرام (WFP) یو وار بیا په افغانستان کې د بشري وضعیت په اړه اندېښنه وښوده او ویې ویل، چې دا مهال نږدې ۱۹ ملیونه وګړي د خوړو له کموالي کړېږي.
دغه اداره وايي، پرون چهارشنبه د قزاقستان د لومړنیو مرستو یوه لویه بسته په ترمز بندر کې ملګرو ملتونو ته وسپارل شوه، چې په افغانستان کې پر ملیونونو کسانو ووېشل شي.
د خوړو نړیوال پروګرام وايي، چې د کډوالو په چارو کې د ملګرو ملتونو د لویې کمشنرۍ په مرسته به دغه مرستې ووېشي.
د خوړو نړیوال پروګرام یا (WFP) په افغانستان کې روان بشري وضعیت ناوړه ګڼي او په دغه هېواد کې له اړو کسانو سره د مرستې لپاره د مرستندویو هېوادونو د ملاتړ پر دوام ټینګار کوي.
"د خوړو نړیوال پروګرام په افغانستان کې د بشري وضعیت په اړه اندېښمن دی."
په افغانستان کې د خوړو نړیوال پروګرام ویاند وحید الله اماني تېره شپه ازادۍ راډیو ته وویل: " زموږ شمېرې ښيي چې دا مهال په افغانستان کې ۱۹ ملیونه وګړي د خوړو له نه خوندیتوب سره مخامخ دي، چې خوراکي توکو او مرستو ته اړتیا لري. WFP خپلو مرستو ته ادامه ورکوي او د ۲۰۲۱م کال له پیله یې تر اوسه پورې تر ۲۱ ملیونو زیاتو کسانو ته په ټول افغانستان کې د خوراکي توکو مرستې رسولي دي."
ښاغلي اماني زیاته کړه، چې د خوړو نړیوال پروګرام هڅه کوي د ژمي تر راتګ مخکې په ځینو زیانګالو سیمو کې خوراکي توکي له وړاندې ذخیره کړي.
نوموړی وايي: "زموږ موخه دا ده چې په راتلونکو میاشتو کې چې ژمی راځي، زموږ پام د افغانستان لیرې پرتو سیمو ته وي. هغه سیمې چې د واورې په ورېدو سره یې لارې بندېږي. هڅه کوو هلته یو څه خوراکي توکي ذخیره کړو، چې د ژمي پر مهال هلته مېشت کسان د خوړو له پلوه خوندي وي."
د خوړو نړیوال پروګرام یا (WFP) د چهارشنبې په ورځ د یوې اعلامیې په خپرولو سره د قزاقستان د مرستو د تسلیمولو خبر ورکړی، چې په افغانستان کې به پر اړو کسانو ووېشل شي.
د دې ادارې په وینا، د قزاقستان په مرستو کې خېمې، کټونه، توشکې او کمبلې، کالي، لوښي، غوړي، وریجې او شیدې شاملې دي.
د خوړو نړیوال پروګرام په اعلامیه کې په افغانستان کې د قزاقستان د شارژدافیر بختیار سانباییف په حواله راغلي چې ویلي یې دي، هدف یې دا دی چې د افغانستان په وروستیو زلزلو او سېلابونو کې له زیانمنو شویو کسانو سره د ملګرو ملتونو له طریقه مرسته وشي.
په اعلامیه کې د افغانستان لپاره د ملګرو ملتونو د ځانګړي استازي د مرستیال رامز الاکبروف وینا هم را اخیستل شوې، چې ویلي یې دي، تېر کال د افغانانو په ځانګړي ډول ښځو او نجونو لپاره ډېر سخت کال و.
هغه ویلي، چې په افغانستان کې بشري اړتیاوې په بېساري ډول زیاتې شوي او د افغانستان تر نیمايي زیات وګړي دا مهال د ژغورنې لپاره مرستو ته اړتیا لري.
