د اوکراین د ولسمشر مېرمنې، د امریکا متحدو ایالتونو ته د سفر پر مهال د نورو دفاعي وسلو غوښتنه کړې ده.
اولنا زلیسنکا پرون د امریکا کانګرس ته وویل، میندې باید وکړای شي خپلو ماشومانو ته ووايي، چې ارام ویده شي او بله هوايي حمله نه کېږي.
د اوکراین د ولسمشر مېرمنې اولنا زلینسکا (Olena Zelenska)، چې روانه اوونۍ د امریکا د متحدو ایالتونو په سفر ده، پرون د امریکا په کانګرس کې وویل، چې اوکراین د امریکا د پوځي مرستو مننه کوي، خو اوس په ځانګړي ډول د هوايي دفاع لپاره تسلیحاتي دستګاوو ته اړتیا لري، څو وکړای شي، د هغې په وینا د روسیې د تروریستي حملو په وړاندې د اوکراین وګړي خوندي کړي.
اولنا زلینسکا وویل، موږ غواړو د اوکراین هره مور او پلار وکړای شي خپلو ماشومانو ته ووايي چې ارام ویده شي او بیا به بله هوايي حمله نه کېږي.
د هغې اشاره د روسیې د تېرې اوونۍ هوايي حملې ته وه، چې د اوکراین په مرکزي برخه کې پر وینیڅا ښار وشوه.
تر هغې حملې وروسته د څلور کلنې لیزا دمتیريوا مړی هم د هغې ریکشا ته څېرمه وموندل شو.
په هغه ویډیو کې چې مور یې تر حملې دوه ساعته مخکې خپره کړې، دغه ماشومه د لوبې په حال کې ښکاري.
د اوکراین د ولسمشر مېرمنې اولنا زلینسکا د ملکیانو د وژل کېدو له دې ډلې د پوخ عمره کسانو د مړینې په باب هم خبرې وکړې، چې تر دویمې نړیوالې جګړې او هولوکاست وروسته ژوندي وو، خو په ۲۰۲۲م کال کې د روسیې د هوايي حملو له کبله ووژل شول.
هغې د واشنګټن د پوځي مرستو مننه وکړه، خو ویلې له بده مرغه جګړه لا هم ختمه شوې نه ده.
د اوکراین ولسمشر ولودمیر زلینسکي چې د اولنا زلینسکا مېړه دی، څو ورځې مخکې ویلي وو، چې تمه لري، واشنګټن ته یې د مېرمنې سفر او کتنې د پام وړ نتیجې ولري.
هغه ویلي وو، چې کانګرس ته به یې د مېرمنې وینا مهمه وي او په دندو کې یې له اوکراین څخه دامریکا متحدو ایالتونو ملاتړ، دغه راز د ده په ټکو د روسیې د ترور په وړاندې د اوکراین د وګړو خوندیتوب او د بشري مرستو زیاتول شامل دي.
اولنا زلینسکا د امریکا له ولسمشر جو بایدڼ، د هغه له مېرمنې جېل بایډن او د بهرنیو چارو له وزیر انتوني بلینکن سره کتلي دي.
