د ناټو سرمنشي وایي، فنلند او سویډن په رسمي ډول دغه سازمان کې د غړیتوب غوښتنلیکونه ورسپارلي دي.
د ناټو سرمنشي ینس سټولټنبرګ په دغه لویدیځ پوځي سازمان کې د فنلند او سویډن د غړیتوب هرکلی کوي او دغه دواړه اروپایي هېوادونه خپل نژدې ملګري یادوي.
سټولټنبرګ دا خبره نن چهارشنبه " د مې په ۱۸مه" وروسته تر هغه خبریالانو ته وکړه چې د فنلند او سویډن سفیرانو د غړیتوب غوښتنلیکونه ور وسپارل.
دغه راز د ناتو عمومي منشي ینس ستولتنبرګ وویل، چې دی له ناټو سره د یو ځای کېدو لپاره د سویډن او فنلنډ د غوښتنلیکونه له زړه هرکلی کوي.
هغه زیاته کړه دا یوتاریخي ګام دی چې دا هېوادونه یې پورته کوي او متحدان به یې د غړیتوب پرلور پر نورو اقداماتو غور وکړي.
سویډن او فنلنډ دواړه د اروپایي ټولنې غړي دي او فنلنډ هم د ځمکې له لارې له روسیې سره ۱۳۴۰ کیلو متره اوږده پوله لري.
د فنلنډ لس سلنه خاوره د دوهمې نړیوالې جګړې وروسته پخواني شوروي اتحاد نیولې ده.
دوی داسې مهال ناټو کې د غړیتوب رسمي غوښتنه کوي چې روسیه په خپلو ګاونډیو هېوادونو کې د ناټو د پوځي حضور زیاتېدو ته اندیښمنه ده.
دغه غوښتنه شاوخوا دوه اوونیو کې ارزول کیږي، خو له دې سره همهاله ترکیې په ناټو کې د فنلند او سویډن د غړیتوب په اړه اندېښنه ښودلې ده او ویلې یې دي، غړیتوب ته به یې مثبته رایه ورنه کړي.
که په دې اړه د ترکیې د ولسمشر رجب طیب اردوغان مخالفت حل شي، په ناټو کې د سویډن او فنلند د غړیتوب پړاوونه د ۸ او ۱۲ میاشتو په موده کې وروستي کیږي.
په ورته وخت کې ویل کیږي چې ناټو غواړي دغو پړاوونو ته ځکه سرعت ورکړي چې اوکراین کې يې د روسیې جګړې ته یو ډول ځواب ورکړی وي.
په ورته وخت کې د امریکا د بهرنیو چارو وزارت ویاند نیډپرایس ویلي، ناټو کې د فنلند او سویډن د غړیتوب لپاره " پياوړې اجماع" موجوده ده.
پرایس ویلي، د ترکیې له مخالفت سره سره امریکا ډاډمنه ده چې ناټو به دا غوښتنې تایید کړي.
