نن د المپیک ژمنۍ مسابقې د چین په پلازمېنه بېجنګ کې پیلېږي. ټاکل شوې ده چې په دې سیالیو کې د ۹۱ هېوادونو ۳ زره لوبغاړي په بیلابېلو سپورتي برخو کې سیالۍ وکړي.
د چین ژمنۍ المپیک سیالۍ به د روانې فبرورۍ تر شلمې پورې دوام وکړي.
سره له دې چې چین د دغو سیالیو چې د المپیک ۲۴مې ژمنۍ سیالۍ دي، د رسمي پرانېستنې لپاره ځانګړي مراسم ترتیب کړي، خو د امریکا د متحدو ایالاتونو په ګډون څو هېوادونه د چین د حکومت له لوري د بشري حقونو د سرغړونې په اعتراض کې پرانېستونکو مراسمو ته رسمي پلاوي نه لېږي.
دوې میاشتې پخوا کله چې له پخواني دود سره سم د المپیک له لومړني ځای یعنې اتن څخه د المپیک مشال ولګول شو، څو له هغه ځایه تر پیکینګ پورې ورسول شي، یو شمېر تبیتیانو د چین د حکومت د پالیسیو خلاف مظاهرې وکړې.
چین نه یوازې د تبت د مسالې په خاطر، بلکې په شین جین کې د ایغور لږکي د بشري حقونو د سرغړونې په خاطر له انتقادونو سره مخامخ دی.
د نامتو چینايي تینس لوبغاړې پینګ شويي د بې درکه کېدو موضوع هم ډېر حیران کړي دي.
خو له دې سره-سره امریکا یوازې له سیاسي پلوه د چین ژمنی المپیک تحریک کړی او امریکايي لوبغاړو ته اجازه شته چې په دې سیالیو کې ګډون وکړي.
دا سیالۍ به د بیجنګ ترڅنګ د چین په دوو نورو لویو ښارونو کې وشي، خو د کرونا وبا د خپرېدو له کبله په لوبغالو کې د نندارچیانو لپاره یو لړ محدودیتونه لګول شوي دي.
دوبنۍ المپیک سیالۍ هم د کرونا تر سیوري لاندې تر خپل اصلي وخت په ځنډ پیل شوې.
