د عمان په سواحلو کې د اسراییلو پر یوې اړوندې ټانکر بېړۍ د حملې پر مهال د یو بریتانوي وګړي له وژل کېدو وروسته پرون دوشنبې (د زمري ۱۱مه) په لندن کې د ایران سفیر محسن بهاروند د بریتانیا د بهرنیو چارو وزارت ته احضار شو.
پر دې بېړۍ د پنجشنبې په ورځ د عمان سواحلو ته نژدې د بې پیلوټه الوتکې برید وشو چې اسراییلي، امریکايي او بریتانوي چارواکو یې پړه پر ایران اچولې ده.
د بریتانیا د بهرنیو چارو وزارت پرون په یوه بیان کې ټینګار وکړ چې ایران باید هغه اقدامات چې نړیوالې سولې او امنیت ته ګواښ پېښولای شي، سمدستي بند کړي.
د بریتانیا صدراعظم د دې بیان له خپرېدو لنډه شېبه وروسته خبریالانو ته وویل چې ایران باید هغه څه چې کرلي یې دي ورېبي.
بوریس جانسن د اسراییلو پر دې اړوندې تېل وړونکې بېړۍ برید د نه منلو وړ او ټکان ورکوونکی کار وباله.
په دې برید کې د ټانکر بېړۍ دوه تنه عمله چې یو د بریتانیا او بل د رومانیا وګړي وو، ووژل شول.
په همدې حال کې د ایران د بهرنیو چارو وزارت هم پرون په تهران کې د بریتانیا د سفارت شارژدافیر احضار کړ او د هغه څه په خاطر یې اعتراض ورته وړاندې کړ چې تهران د بریتانیا متناقضې او د وارخطایۍ څرګندونې بللې دي.
د ایران د بهرنیو چارو وزارت په یوه بیان کې ویلي دي چې دا هېواد به د پر وخت، مناسب او غوڅ ځواب په ورکولو سره د هر راز پاروونکو اقداماتو پر وړاندې خپله دفاع وکړي. په بیان کې راغلي، دا لومړی ځل نه دی چې بریتانیا د شواهدو له وړاندې کولو پرته پر ایران تورونه لګوي.
له بلې خوا د اسراییل دفاع وزیر هم پرون د دې هېواد پر اړوندې بېړۍ د برید په اړه چې یو ځل بیا یې ایران ګرم پرې وباله، د نړیوالو د اقدام غوښتنه وکړه.
اسراییلو ادعا کړې ده چې ایران تېر کال هم د بېلابېلو هېوادونو پر بېړیو لږ تر لږه پنځه حملې کړې دي. د اسراییلو دا ادعا هم ایران په پرله پسې ډول رد کړې ده.
