د امریکا د متحد ایالتونو ولسمشر ډونالډ ټرمپ په کانګرس کې د ولسمشرۍ د انتخاباتو د الېکټرول کالج راییو تر شمېرلو وروسته وویل چې د جنوري په شلمه به واک جوبایډن ته وسپاري.
تمه ده چې جوبایډن د امریکا د متحد ایالتونو د ۴۶م ولسمشر په توګه د جنوري په شلمه د لوړې مراسم ترسره کړي.
کانګرس د نوومبر د درېیمې نېټې په ټاکنو کې جوبایډن د ولسمشر او کمالا هاریس د هغه د مرستیالې په توګه تایید کړل.
د امریکا د استازیو جرګې غړیو نن دا تایید کړه چې بایډن په ټاکنو کې درې سوه شپږ الېکټرول کالج رایې خپلې کړي دي او د جمهوري غوښتونکو کاندید ډونالډ ټرمپ دوه سوه دوه دېرش الېکټرول کالج رایي خپلې کړي دي.
یو شمېر جمهوري غوښتونکو د ټاکنو پر نتیجو اعتراض درلود چې د سنا او استازیو جرګې د اکثریت له لوري رد شو.
د کانګرس غونډه پرون د اعتراض کوونکو له لوري ګډه وډه شوه او پرون ونه توانېده چې د بایډن بریا تایید کړي.
د کانګرس ودانۍ ته د مظاهره چیانو له داخلېدو سره ډزې وشوې چې په پیل کې د ټرمپ یوه ملاتړې ووژل شوه.
وروسته بیا په راپورونو کې راغلل چې درې تنه نور هم د شخړو پرمهال وژل شوي دي.
د کانګرس ودانۍ ته په زوره د اعتراض کوونکو د ورننوتو، د کړکیو د ماتېدو او شخړو له امله پولیسو ۵۲ تنه نیولي دي.
څو ساعته وروسته تردې چې د کانګرس ودانۍ له اعتراض کوونکو تشه شوه، وضعیت عادي شو، د سنا او استازیو جرګې غړیو د انتخاباتو پر نتیجو بیا غونډه وکړه او بایډن یې بریالی وباله.
یو شمېر سناتورانو د میسوري د سناتور جاش هاولي او د تکزاس د سناتور ټېډ کروز په مشرۍ د بایډن له بریا سره مخالفت څرګند کړ.
د ولسمشر ټرمپ مرستیال مایک پنس چې د غونډې مشري یې کوله وویل، هغه کسان چې نن یې په پلازمېنه کې شخړو ته مخه کړه بریالي نه شول.
له اعتراضونو وروسته یو شمېر سناتورانو چې د بایډن له بریا سره یې مخکې مخالفت کاوه خپل نظر بدل کړ.
د راییو تر شمېرلو وروسته ولسمشر ټرمپ په یوه بیان کې ادعا وکړه چې د نوومبر د درېیمې نېټې په ټاکنو کې درغلۍ شوي دي خو ویې ویل چې له جنجال پرته به واک بایډن ته د جنوري په شلمه وسپاري.
