د سعودي عربستان چارواکو ویلي چې د خپلو تېلو پر تاسیساتو د وروستۍ حملې په ځواب کې به مناسب اقدام وکړي.
د سعودي عربستان د تېلو پر سترو تاسیساتو د سپټمبر په څوارلسمه حمله وشوه.
په یمن کې حوثي ملېشه وسله والو چې ایران یې ملاتړ کوي، د سعودي پر تاسیساتو د حملې مسؤلیت واخیست.
خو ریاض او واشنګټن وايي چې ایران د حملو تر شا و.
د وروستیو حملو له امله د سعودي عربستان د تېلو د تصفیې تقریباً نیمايي تاسیسات له کاره لوېدلي وو.
د سعودي عربستان د بهرنیو چارو وزیر عادل الجبېر د شنبې په ورځ یو وار بیا پر ایران تور پورې کړ چې د هغوی د تېلو پر تاسیساتو په حملو کې یې لاس درلود.
عادل الجبېر د سپټمبر په یویشتمه په ریاض کې خبریالانو ته وویل: موږ ایران د دې جنایتکار عمل مسؤل ګڼو.
الجبېر زیاته کړه چې له ملګرو ملتونو یې غوښتنه کړې چې خپل کارپوهان ور واستوي او د پېښې په اړه په څېړنو کې ګډون وکړي.
د سعودي عربستان د بهرنیو چارو وزیر وویل چې د څېړنو تر بشپړېدو وروسته به د داسې تشدد مناسب ځواب ورکړي.
خو ایران پر ځان لګېدلي تورونه کړي دي.
د ایران د سپاه پاسداران انقلاب چارواکو هم پرون خبرداری ورکړ چې که حمله پرې وشي، متقابل عمل به وکړي.
د سپاه پاسداران انقلاب قوماندان جنرال حسین سلامي د ایران له دولتي ټلویزیونه په وینا کې وویل چې د ایران ځواب به حد او پوله نه لري.
هغه وویل: احتیاط وکړئ، موږ به هر تشدد کوونکي ته ځواب ورکړو، موږ به تر هغو چې تشدد کوونکی په بشپړ ډول له منځه ولاړ نه شي، د دښمن له ځپلو لاس نه اخلو.
دا په داسې حال کې ده چې امریکا د متحدو ایالاتو ولسمشر ډونالد ټرمپ د سپټمبر په شلمه په سعودي عربستان او متحده عربي اماراتو کې د امریکايي ځواکونو د متوسطې کچې تقویتي پلان سره موافقه وکړه.
د امریکا د لویو درستیزانو د کمېټې مشر جنرال جوزف ډانفورد پرون وویل چې سعودي عرب او متحده اماراتو ته د امریکايي ځواکونو د استولو د پلان جزیات به وروسته څرګند کړي.
د امریکا دفاع وزیر مارک ايسپر په دې اړه وویل چې سعودي عربستان او متحده عربي اماراتو غوښتنه ورڅخه کړې چې د هغوی د هوايي ځواکونو او د مزائیلو د دفاعي سېسټم د پیاوړي کولو لپاره مرسته وکړي.
مارک ايسپر وویل چې د ځواکونو تقویتي پلان د امریکا لومړی ګام دی او د نورو اقداماتو امکان یې هم رد نه کړ.