په خلیج کې له یو شمېر حملو وروسته چې د تور ګوته یې ایران ته ونیول شوه، د امریکا د قواوو مرکزي قوماندان کنټ مکنزي پرون پنجشنبه ژمنه وکړه چې د خلیج په ستراتیژیکو اوبو کې به د سمندري امنیت د خوندیتوب لپاره جدي هلې ځلې وکړي.
مکنزي د سعودي عربستان پلازمېنې ریاض ته نږدې په شهزاده سلطان هوايي اډه کې خبریالانو ته وویل چې دوی حاضردمه په منځني ختیځ کې د ازادې بېړۍ چلونې د حق د اهمیت په اړه له نړیوالې ټولنې سره په خبرو بوخت دي.
ده همداراز وویل، له خپلو متحدانو سره سخت کار کوي څو یوې داسې حللارې ته ورسېږي چې له دې سیمې څخه د تېلو او نورو حساسو ضروري شیانو ازاد تګ راتګ ممکن وي.
د امریکا د قواوو مرکزي قوماندان دا څرګندونې داسې وخت وکړې چې د دغه هېواد لوی درستیز جنرال جوزیف ډانفورد تېره اوونۍ وویل، متحد ایالتونه د واشنګټن او تهران ترمنځ د ترینګلو اړیکو په اوج کې غواړي چې په خلیج کې د بېړیو د ازاد تګ راتګ د تضمین لپاره یو ائتلاف جوړ کړي.
د خلیج په سیمه کې کړکېچ په وروستیو اوونیو کې ډېر زیات شوی.
امریکا پر ایران تور لګوي چې په دې سیمه کې یې د تېلو پر بېړیو ګڼې حملې کړي او تهران د امریکا یوه بې پيلوټه الوتکه ویشتې ده.
د نړۍ درېيمه برخه تېل د خلیج له اوبو څخه تېرېږي.
د امریکا د بهرنیو چارو وزیر مایک پامپیو تېره میاشت وویل، هیله لري چې د متحده عربي اماراتو او سعودي عربستان په ګډون به تر ۲۰ ډېر هېوادونه د سمندري ټرانسپورت د امنیت لپاره په شریکه کار وکړي.
مکنزي وايي چې د امریکا متحده ایالتونه له خپلو نږدې متحدانو سره په دې غور کوي چې د هرمُز تنګي په شمول په ستراتیژیکو اوبلارو کې ازاد ټرانسپورټ یقیني کړي.
ده د سي این این دا راپور تأیید نه کړ چې ګنې د امریکا د ولسمشر ډونالد ټرمپ حکومت غواړي چې سعودي عربستان ته ۵۰۰ سرتېري واستوي، څو ایران ته زور وښيي.
امریکا د مې په میاشت کې اعلان وکړ چې د ایران د ګواښ په وړاندې منځني ختیځ ته ۱۵۰۰ پوځیان لېږي.
د امریکا د قواوو مرکزي قوماندان سعودي عربستان ته یوه ورځ وروسته له دې سفر وکړ چې کانګرس پر سعودي عربستان او نورو متحدانو د ۸ ميلیاردو او سل ميلیونو ډالرو په ارزښت د وسلو د پلورلو خلاف رأیه ورکړه، خو ګومان کېږي چې ولسمشر ټرمپ به د کانګرس دا پرېکړه ویټو کړي.