کابل چاپ نننیو ورځپاڼو د سولې مشورتي لویې جرګې د پرېکړو، د جمهوري ریاست د راتلونکو انتخاباتو او نورو بېلابېلو مسایلو په اړه لیکنې او تبصرې کړې دي.
- دنیا
دنیا خپلواکې ورځپاڼې په خپلې سرمقاله کې پوښتنه کړې چې ایا مشورتي لویې جرګې ستونزه حل کړه که زیاته؟
وړاندې په سرمقاله کې راغلي، حکومت د سولې له مشورتي جرګې څخه په استفادې داسې سرې کرښې رسم کړې چې په تمامه معنی د سولې پر ضد دي.
د سرمقالې لیکوال خپلې پوښتنې ته په ځواب کې لیکلي، د جرګې پرېکړهلیک کله هم د سولې له بهیر سره مرسته نهشي کولای، بلکې د لیکوال په اند دغه بهیر له ستونزو سره مخ کولای شي.
- هېواد
هېواد دولتي ورځپاڼې په خپلې سرمقاله کې لیکلي، د سولې مشورتي جرګې پرېکړو وښوده چې ټول ملت په یوه غږ سوله غواړي.
د سرمقالې لیکوال د چا له نوم اخیستو پرته وايي، اوس خلکو ته ثابته شوه چې څوک ملي شخصیتونه او سوله غواړي او څوک د سولې په وړاندې خنډ دي.
- ویسا
ویسا خپلواکې ورځپاڼې د دیني علماوو په قول لیکلي، د مشورتي لویې جرګې درېیمه ماده د داعش جګړې ته زمینه برابروي.
د همدې ورځپاڼې په سرمقاله کې یادونه شوې چې که مشورتي لویه جرګه په رښتینې معنی هېواد شموله، د ټولو سیاسي اړخونو په ګډون او فعال حضور دایره شوې وی، دا به د ملي اجماع تمثیل وی او ارزښت بهیې درلود.
د ملي ارمان ورځپاڼې په سرمقاله کې راغلي، د مشورتي جرګې په پرېکړهلیک کې هغه څه راغلي چې په تېرو کلونو او میاشتو کې افغان سیاستوالو او عامو خلکو غوښتل او پرې ټینګار یې کړی.
- هشت صبح
هشت صبح خپلواکې ورځپاڼې لیکلي، د اساسي قانون له مخې ولسمشر نهشي کولای چې طالب زندانیان ازاد کړي.
د همدې ورځپاڼې په سرمقاله کې راغلي، د طالبانو جګړهییز سیاست وښوده چې دوی له سولې وروسته په سیاسي فضا کې له ورکېدو وېره لري.
وړاندې په سرمقاله کې راغلي، حتی دوی له دې هم ډارېږي چې د انتخاباتو له لارې یې نهشي ګټلی او خپله بقا په جګړه کې ګوري.
- ماندګار
ماندګار خپلواکې ورځپانې په خپل لومړي مخ کې په غټو ټکو لیکي، د نړیوالې ټولنې له ملاتړه غیر د انتخاباتو ترسره کېدل ناممکن دي.
د همدې ورځپاڼې په سرمقاله کې یادونه شوې چې د جمهوري ریاست په راتلونکو انتخاباتو د ارګ او نړیوالې ټولنې کشمکش دی.
وړاندې په سرمقاله کې راغلي، په افغانستان کې له ولسواکۍ او انتخاباتو د نړیوالې ټولنې له ملاتړه انکار نهشي کېدای.