ایران وايي، له لبنانه د امریکا د بهرنیو چارو د وزیر مایک پامپیو له غوښتنې سره سره به دوی له لبنان سره اړیکې پراخې کړي.
د ایران دولتي ټلوېزیون راپور ورکړی چې تهران وايي، له بېروته د امریکا د بهرنیو چارو د وزیر مایک پامپیو د غوښتنې سربېره چې دوی پاروونکې او لاسوهونکې یاده کړې له لبنان سره اړیکې پراخوي.
د ایران د بهرنیو چارو وزارت ویاند بهرام قاسمي پرون د پامپیو خبرې رد کړې او ویېویل:
"متحده ایالاتو په منځني ختیځ کې د خپلو ناکامیو په خاطر د وېرې او ترهې زړې وسلې ته لاس اچولی، څو خپلې پالېسۍ په نورو هېوادونو تحمیل کړي."
د ایران د بهرنیو چارو وزارت ویاند بهرام قاسمي
قاسمي دا خبرې پرون په یوه ټلوېزیون بیان کې وکړې.
هغه وویل، ایران د لبنان ملي حاکمیت او خپلواکۍ ته درناوی لري او تر خپلې وسې په لبنان کې د یووالي د ساتلو او له دغه هېواد سره د خپلو اړیکو د خوندیتوب په خاطر هڅه کوي.
د امریکا د بهرنیو چارو وزیر مایک پامپیو د جمعې په ورځ لبنان ته تللی و او دا هېواد یې وهڅاوه چې له تهرانه واټن ونیسي.
پامپیو چې د منځني ختیځ څو هېوادونو ته د ایران په وړاندې د ملاتړ د جلب په خاطر سفر کړی و، وویل:
"سپینهیې وایم لبنان او لبنانیان یو انتخاب لري، یا په مېړانه د یوه خپلواکه ملت په توګه مخته لاړ شي یا دا چې د ایران او حزبالله تورو هڅو ته اجازه ورکړي، څو یې راتلونکی ورته وټاکي."
د امریکا د بهرنیو چارو وزیر له خپلې مېرمنې سره بېروت کې له الوتکې د ښکته کېدو پر مهال
حزبالله ډله چې په لبنان او سیمه کې یې نفوذ پراخ دی په لبنان کې له ۳۰ وزارتونو درې په واک کې لري او د دغه هېواد په سیاست کې یې هم خبره ښه چلېږي.
حزبالله ډله په ۱۹۸۲ کال کې د ایران د سپاه پاسداران انقلاب په مرسته تأسیس شوه.
له ایران سره په ګډه دغه ډله په وروستیو څو کلونو کې د سوریې په کورنۍ جګړه کې ښکېله ده او د بشار اسد د رژیم د مخالفو ملېشه ډلو او داعش یا اسلامي دولت نومې ډلې په وړاندې جنګېږي.
د ایران د بهرنیو چارو وزارت ویاند بهرام قاسمي دا هم ویلي:
"حزبالله یو قانوني او منل شوی ګوند دی او پامپیو څنګه کولای شي چې د دغه ګوند په اړه ناسمې څرګندونې وکړي؟"
د واشنګټن او تهران ترمنځ کړکېچ هغه وخت زیات شو چې د امریکا ولسمشر ډونالد ټرمپ تېر میلادي کال له ایران سره له اټمي تړونه امریکا وایستله او ورپسې یې څو واره په دغه هېواد کلک بندیزونه ولګول.
راپور: صفيالله ستانکزی