د جرمني د هوایي چلند ادارې له خپلو اروپايي متحدینو او امریکا سره له سلا او مشورو وروسته پریکړه وکړه چې په جرمني کې د ماهان هوایي د شرکت د الوتکو کېناستل منع کړي.
دا خبره د جرمني د حکومت ویاند سټیفن شیبرټ پرون دوشنبه په برلین کې په یوه خبري کنفرانس کې وکړه.
نوموړي وویل:
"په حقیقت کې له دې انکار نهشي کېدای چې دغه شرکت به جرمني ته داسې شیان انتقال کړي چې ورسره زموږ امنیت اغېزمن کېدای شي."
د امریکا د بهرنیو چارو وزیر مایک پامپیو د جرمني د دې اقدام ستاینه وکړه او د واشنګټن له متحدینو یې غوښتي چې ورته اقدامات وکړي.
ماهان ایر د ایران دوهم لوی هوایي شرکت دی چې له ۲۰۱۱ میلادي کال راهیسې د امریکا په بندیزونو کې په نښه کېږي.
واشنګټن تل د نورو هېوادونو له چارواکو غوښتي چې د دې شرکت الوتکو ته په خپلو هېوادونو کې د کېناستو اجازه ورنهکړي.
د امریکا د خزانې وزارت پر یو شمېر هېوادونو او شرکتونو په لګول شويو بندیزونو کې هم خبرداری ورکړی چې د ماهان شرکت ته نه د کېناستو اجازه ورکوي او نهدې هم ورته خدمات وړاندې کوي.
ایران د امریکا متحده ایالات او اسرائیل تورن کړي چې هڅه کوي له اروپایي هېوادونو سره چې تر اوسهیې له تهران سره د ۲۰۱۵ میلادي کال د اټمي تړون د ژغورلو هڅه کړې، د دې هېواد اړیکې زیانمنې کړي.
خو د جرمني د حکومت ویاند زیاته کړه چې دا کار یې د خپلو امنیتي دلایلو په خاطر کړی دی.
جرمني دغه اقدام وروسته له هغې کوي چې پهدې وروستیو کې یې ایران ته د جاسوسۍ په تور د یوه ۵۰ کلن افغانيالاصله جرمني د نیول کېدو خبر ورکړی و.
ایران دغه تور بېاساسه بللی دی.
د جرمني د بهرنیو چارو وزارت ویاند کرستوفر برګر ویلي چې ماهان شرکت د ایران له سپاه پاسداران انقلاب سره اړیکې لري او د ایران او سوریې ترمنځیې پوځي الوتنې ترسره کړې دي.
ایران د روسیې تر څنګ د سوریې په جګړه کې د سوریې د ولسمشر بشار الاسد د رژیم سیاسي او پوځي ملاتړ کوي.
پهدې جګړه کې سلګونه زره کسان وژل شوي او میلیونونه هم له خپلو سیمو بېځایه شوي دي.