د ایران د یوه پوهنتون محصلینو د ډسمبر په ۳۰مه د دوهمې ورځې لپاره خپلو مظاهرو ته دوام ورکړ او د پوهنتون له چارواکو د استعفا غوښتنه کوي.
د ایران د ازاد پوهنتون محصلینو د مظاهرو پر مهال د دغه پوهنتون د رئیس علي اکبر ولایتي د استعفا غوښتنه کوي.
مظاهره کوونکي د هغو قربانیانو عکسونه له ځانه سره ګرځوي چې د ډسمبر په ۲۵مه د تهران په شمال لوېدیځ کې یې بس له یوه کانکرېټي دېوال سره ټکر وکړ.
په دې پېښه کې ۱۰ تنه محصلین ووژل شول او ۲۷ نور ټپیان شول.
دغه بس د همدې پوهنتون د ساینس او تحقیق د څانګې پر لور په غرنۍ سیمه کې روان و چې له سړکه واوښت او پېښه وشوه.
د پوهنتون چارواکو په لومړي سر کې بس چلوونکی ملامت کړ، خو وروسته معلومه شوه چې دغه بس ډېر زوړ و او په سمه توګه نهو ساتل شوی.
محصلین وایي، دوی د نویو نقلیه وسایطو د اخيستلو وړاندیز کړی و.
د ایران د نیمه دولتي خبري اژانس ایسنا د راپور له مخې، تر دې پېښې وروسته د ایران د ازاد پوهنتون یو شمېر د منځني عمر لرونکي چارواکي له دندو لیرې شوي دي او ځیني یې نیول شوي دي.
لوی څارنوال محمد جعفر منتظري له اعتراض کوونکو زدهکوونکو سره د لیدو پر مهال د ارامتیا غوښتنه کړې او ژمنهیې وکړه چې دا قضیه به شخصاً تعقیبوي او هر څوک چې په دې قضیه کې ګرم ثابت شي، سزا به وویني.
ایران هغه هېواد دی چې د نړۍ په سطحه د ټکر له کبله د تلفاتو شمېر پهکې تر ټولو ډېر دی.
راپورونه وایي، پر ایران د امریکا متحده ایالاتو لهخوا د نویو بندیزونو په لګولو سره په ایران کې د عامه ټرانسپورت د عصري کېدو هڅې پڅې شوې دي.
بهرنۍ کمپنۍ د همدې بندیزونو له کبله له ایرانه ووتلې.
ایران په ۲۰۱۸ کال کې د ځینو لویو مظاهرو شاهد و چې له کوچنیو اعتراضونو پیل شوې.
اقتصادي ستونزې هغه څه وې چې د کال په نیمایي کې یې په تهران او نورو ښارونو کې د خلکو غصه راپورته کړه او د حکومت ضد په شعارونو سره مظاهرې په ټول هېواد کې خورې شوې.