په اسلاماباد کې د امریکا د متحده ایالاتو سفارت نن چهارشنبه د اکټوبر ۱۰مه، پاکستان ته د زلمي خلیلزاد د سفر د پای ته رسېدو خبر ورکړ.
د امریکا د سفارت په خبرپاڼه کې ویل شوي چې د افغانستان د سولې لپاره د امریکا د بهرنیو چارو وزارت ځانګړي استازي، زلمي خلیلزاد له مهمو پاکستاني چارواکو سره خبرې کړې دي.
د امریکا د بهرنیو چارو وزیر مایک پامپیو یوه میاشت مخکې زلمی خلیلزاد د افغانستان د سولې لپاره د خپل حکومت ځانګړی استازی وټاکه.
د ځانګړي استازي په توګه تر ټاکل کېدو وروسته، دا پاکستان ته د زلمي خلیلزاد لومړی رسمي سفر دی.
په اسلاماباد کې د امریکا د متحده ایالاتو سفارت نن په خبرپاڼه کې ویلي چې زلمي خلیلزاد د پاکستان د حکومت له مهمو چارواکو سره پر دې چې په افغانستان کې د بحران د حل لپاره سیاسي جوړجاړی څرنګه کېدلای شي، خبرې کړې دي.
په بیان کې راغلي چې زلمي خلیلزاد له پاکستاني چارواکو سره په خبرو کې ټینګار کړی چې د پاکستان د باثباته راتلونکې لپاره په افغانستان کې د سیاسي جوړ جاړي له لارې د سولې ټینګېدل مهم کار دی.
د افغانستان د سولې لپاره د امریکا د بهرنیو چارو وزارت ځانګړی استازی، زلمی خلیلزاد پرون له کابله اسلاماباد ته ورسېد.
د پاکستان د بهرنیو چارو وزارت ویاند محمد فیصل پر ټویټر لیکلي چې خلیلزاد په اسلاماباد کې د پاکستان د بهرنیو چارو له وزیر شاه محمود قریشي او د هغه له مرستیالې، تهمینه جنجوعه سره کتلي دي.
پاکستاني رسنیو تر دې وړاندې داسې اټکل کاوه چې خلیلزاد به د پاکستان د پوځ له مشرتابه سره هم ګوري، خو تر اوسه پهدې اړه معلومات نهشته چې هغه له پوځي چارواکو سره کتلي که نه؟
د پاکستاني رسنیو په حواله، شاه محمود قریشي خلیلزاد ته ډاډ ورکړی چې "په افغانستان کې د سولې د ټینګښت لپاره د امریکا د هڅو ملاتړ کوي او دواړو خواو پر دې مسئله د همکارۍ ژمنه کړې ده."
شاه محمود قریشي ویلي:
"پاکستان به د افغانستان د لانجې د سیاسي حل موندلو لپاره په هڅو کې د خپل رول ادا کولو ته دوام ورکړي."
خو په پاکستان کې یو شمېر سیاسي کتونکي پهدې اړه له احتیاط سره خوشبیني څرګندوي.
په اسلاماباد کې پخوانی ډیپلومات ایاز وزیر وايي، د کابل او اسلاماباد ترمنځ د عدم امنیت او اعتماد له شتهوالي سره، داسې همکاري ګرانه ده.
ایاز وزیر زیاته کړه:
"د پاکستان څخه د افغانستان توقع ده چې طالبانو ته دې ځای نهورکوي یا د طالبانو مشران دې وباسي او پاکستان له افغانستان دا توقع لري چې خاوره بهیې د پاکستان پر ضد نهاستعمالېږي. د دې دوو مسئلو حل چې وموندل شي نور بل جنګ نه سره لرو. دا دوه ډېرې غټې خبرې دي."
د یو شمېر نورو سیاسي کتونکو په باور، افغانستان په راتلونکو څو ورځو کې د ولسي جرګې انتخابات لري او د جمهور رئیس محمد اشرف غني د واکمنۍ تر پای ته رسېدو هم کم وخت پاتې دی، نو خلیلزاد ښايي وغواړي چې د افغانستان د حکومت او طالبانو ترمنځ د خبرو د پیل لپاره دې عملي پرمختګ ژر وشي.
په اسلاماباد کې د امریکا سفارت په وینا، زلمی خلیلزاد له پاکستانه د سعودي عربستان پلازمېنې، ریاض ته روان دی.
هغه به متحده عربي اماراتو او قطر ته هم ولاړ شي.
د امریکا د بهرنیو چارو وزارت د اکټوبر په ۳مه په یوه بیان کې وویل چې د خلیلزاد هڅې په افغانستان کې د سولې او پخلاینې له پروسې سره همکارۍ ته د امریکا تعهد څرګندوي.
