د افغانستان د سولې عالي شورا وايي، له وسلهوالو مخالفینو سره مذاکرات او د سولې د ټينګښت لپاره هره هڅه باید له افغان حکومت او د سولې عالي شورا سره په تفاهم ترسره شي.
د سولې عالي شورا وايي، د افغان سولې لپاره په ملي او نړیواله کچه ډېرې هلې ځلې شوي او اړتیا ده، څو پخواني جهادي مشران هم د سولې په برخه کې د لاسته راوړنو د پیاوړتیا لپاره خپل وړاندیزونه د سولې له عالي شورا سره شریک کړي.
د دغې شورا یوه غړي محمد امین وقاد د دوشنبې په ورځ «۱۳۹۷ کال د وږې ۱۹» له ازادي راډيو سره دا خبرې د سولې د خبرو په هدف د ملي هیئت د تشکیل په تړاو د پخواني جهادي مشر عبدرب رسول سیاف د تېرې ورځې څرګندونو ته په اشارې وکړې.
نوموړي وویل، تر اوسه دغه موضوع له دوی سره نهده شریکه شوې.
ښاغلي وقاد زیاته کړه:
"دوی باید د سولې عالي شورا سره یو مستقیم یا غیر مستقیم تماس لرلی وي او ویل شوي وی چې دوی څومره مرسته کولای شي، څو د سولې عالي شورا سره په تفاهم کارونه ترسره شوي وی، شویو کارونو او رامنځته شویو پلانونو ته په پام او کومې زمینې چې برابرې شوي، دوی باید خپل نظرونه د سولې عالي شورا سره شریک کړي او موږ د دغو هڅو ملاتړ کوو."
ازادي راډیو وغوښتل چې پهدې اړه د افغان حکومت نظر هم واخلي، خو جمهوري ریاست او اجرائیه ریاست پهدې اړه له څه ویلو ډډه وکړه.
دا پهداسې حال کې ده چې کابل چاپ یو شمېر ورځپاڼو د پخواني جهادي مشر عبدرب رسول سیاف په حواله ویلي چې یو شمېر بانفوذه شخصیتونه او لوی ملي ائتلاف دې نتېجې ته رسېدلي چې وسلهوالو طالبانو سره د سولې خبرو اترو لپاره یو پلاوی وټاکي.
د ښاغلي سیاف په حواله دا هم راغلي چې د دغه پلاوي په ترکیب کې به د حکومت استازي او ټول اړخونه ونډه ولري.
د سرچینو په حواله ښاغلي سیاف ویلي چې له وسلهوالو طالبانو سره سوله باید په افغانستان کې د جګړې ختمولو ته لار هواره کړي.
په ورته وخت کې یو شمېر افغان سیاسي کارپوهان وايي، پخواني جهادي مشران او د حکومت اپوزېسیون باید له وسلهوالو طالبانو سره د سولې د مذاکراتو لپاره د نړیوالې ټولنې او حکومت اقداماتو ته په تمه وي.
د دغو کارپوهانو له ډلې یونس فکور وايي، تر دې وړاندې هم له وسلهوالو طالبانو سره د سولې د خبرو اترو لپاره ورته وړاندیزونه شوي دي.
دی زیاتوي:
"لومړی داسې وړاندیز شوی و چې یو پلاوی باید دوی وټاکي او وسلهوالو طالبانو تهیې ولېږي، خو ښاغلي سیاف تېره ورځ دا خبره اصلاح کړه چې باید دغلته د حکومت یو پلاوی هم شامل وي، خو له دې ټولو سره سره دا ډول وړاندیزونه له وخته مخکې دي، دوی باید انتظار وباسي چې حکومت او نړیواله ټولنه له وسلهوالو طالبانو سره د سولې د مذاکراتو بهیر پیل کړي."
ښاغلی فکور وايي، پخواني جهادي مشران د سولې په مذاکراتو کې د ونډې اخیستلو له لارې غواړي چې تر ډېره خپل موضوعات په دغو مذاکراتو کې مطرح کړي.
نوموړی ټينګار کوي چې کله چې وسلهوال طالبان د سولې خبرو اترو ته چمتو شي د سولې د پلاوي په تشکیل کې باید کارپوهان او په ځانګړي ډول هغه کسان شامل شي چې د سولې او جګړې په برخه کې پوهېږي، تر څو دغه مذاکرات مثبته پایله ولري.
راپور: ناجیه ساپۍ