د افغانستان د سولې عالي شورا وايي چې د افغانستان د سولې او ثبات په تړاو په سعودي عربستان کې غونډه به ښې پایلې ولري.
د دې شورا اداري پلاوی وايي چې د سعودي عربستان په جدې ښار کې د جوړېدونکې غونډې پایلو ته هیلهمن دي.
د دغې شورا مرستیال حاجي عزیزالله دین محمد نن دوشنبه «۱۳۹۷ کال د وږې ۱۹» ازادي راډيو ته وویل، سعودي عربستان د وسلهوالو په ملاتړو هېوادونو نفوذ او ښې اړیکې ورسره لري.
ښاغلی دین محمد وايي چې له سعودي عربستانه دا ډول غوښتنه د پخواني ولسمشر حامد کرزي په وخت کې شوې وه، خو سعودي عربستان د دا ډول غونډو د کوربهتوب لپاره شرط درلود.
دی زیاتوي:
"دغه غوښتنه د سعودي له پاچا د حامد کرزي په وخت کې څو څو وارې وشوه، خو د سعودي شرطونه دا وو:
- طالبان دې له القاعده پرېکون اعلان کړي.
- د سولې په برخه کې دې افغان حکومت دوی ته بشپړ واک او صلاحیت ورکړي.
طالبان دې شرط ته چمتو نهوو، نو ځکه موضوع پاتې کېده، د اسلامي همکاریو سازمان له لوري غونډه دغه یو ښه بدلون دی او نتایج بهیې هم ډېر ښه وي."
ټاکل شوې چې سبا سې شنبه د اسلامي همکاریو سازمان د دایمي غړو په کچه د سعودي عربستان په جدې ښار کې د سعودي د پاچا سلمان بن عبدالعزیز ال سعود په غوښتنه د افغانستان د سولې او ثبات په اړه غونډه جوړه شي.
د دغه سازمان مشر ډاکتر یوسف بن احمد العطیمین په یوه اعلامیه کې د سعودي عربستان له پاچا مننه کړې چې د افغانستان د سولې او ثبات د هڅو له چټکتیا ملاتړ کوي.
دا پهداسې حال کې ده چې له دې وړاندې هم د روان میلادي کال د جولای په میاشت کې د سعودي عربستان په سپېڅلي ښار مکې او جدې کې د اسلامي نړۍ د علماوو غونډې جوړې شوې وې او په یوه اعلامیه کې یې په افغانستان کې د ناحقه وینو د بهېدو د مخنیوي غوښتنه کړې وه.
د ولسي جرګې د نړیوالو اړیکو کمېسیون وايي، د افغانستان د سولې په پروسه کې له سعودي عربستان د نړیوالو د همکاریو غوښتنې زیاتې شوي.
د دغه کمېسیون غړې مېرمن ارین یون ازادي راډیو ته وویل، د افغانستان د سولې په بهیر کې د سعودي عربستان هڅې ګټورې دي چې پهدې وروستیو کې د سعودي عربستان پام افغانستان ته زیات شوی دی.
نوموړې وايي:
"دا ډول کنفرانسونه د افغانستان د سولې په راتګ کې ګټور تمامېدای شي، اوس چې ګورو افغانستان ته د سعودي عربستان توجه زیاته شوې چې دا یو ښه زېری دی، زه هیله لرم چې د دا ډول کنفرانسونو پایلې به ښې وي."
له تېرو شااوخوا ۱۷ کلونو راهیسې د افغانستان د سولې په تړاو په بېلابېلو هېوادونو کې مختلفې غونډې جوړې شوې، خو تر اوسه هم کومه څرګنده پایلهیې نهده ورکړې.
د ولسي جرګې د نړیوالو اړیکو د کمېسیون غړي ټینګار کوي چې افغان حکومت د سولې په تړاو د دا ډول غونډو پرېکړې جدي تعقیب کړي.
راپور: رحمتالله افغان