د امریکا د بهرنیو چارو وزیر مایک پامپیو اعلان وکړ چې زلمی خلیلزاد د افغانستان لپاره د امریکا د بهرنیو چارو وزارت خاص سلاکار وټاکل شو.
مایک پامپیو پرون ناوخته اسلاماباد ته د سفر پر لار له هغو خبریالانو سره په خبرو کې دا اعلان وکړ چې له ده سره پاکستان او هند ته ځي.
د امریکا د بهرنیو چارو وزیر وویل چې ښاغلی خلیلزاد به د افغانستان د سولې او پخلاینې په چارو کې له دوی سره همکاري وکړي.
پامپیو وویل، ښاغلی خلیلزاد به د امریکا د بهرنیو چارو وزارت ته ورشي او دا ټول مسایل به مخته یوسي.
روېټرز لیکلي چې د زلمي خلیلزاد مقرري دا ښکاروي چې د امریکا اداره د افغانستان د سولې د پروسې په اړه جدي ده.
په خپله ښاغلي خلیلزاد د روان کال په جوزا میاشت کې له ازادي راډیو سره غږېدلی و او ویېویل چې د امریکا سیاست له اوربنده ملاتړ او د سولې په خبرو کې مثبت رول لوبول دي.
نوموړي ویلي و:
"د امریکا د بهرنیو چارو وزارت وویل چې امریکا له اوربند او د سولې له خبرو ملاتړ کوي او حاضر دی چې پهکې برخه واخلي. د امریکا سیاست له اوربند ملاتړ او د سولې د خبرو د پیل ملاتړ دی او پهدې برخه کې مثبت رول لوبول دي."
زلمی خلیلزاد په خټه افغان او په امریکا کې هم یو با نفوذه سیاستوال ګڼل کېږي او وخت نا وخت د افغانستان پر ګاونډیو په ځانګړي ډول پر پاکستان د ترورېزم پر وړاندې د مبارزې په برخه کې د همکارۍ د نهکولو له کبله انتقادونه کوي.
خلیلزاد داسې وخت تعیین شو چې د امریکا حکومت په پاکستان باندې د ۳۰۰ میلیونه ډالرو مرسته لغوه کړې ده او علتیې د ترهګرۍ په وړاندې په مبارزه کې د پاکستان پاتې والی ښودل شوی دی.
د نړیوالو چارو یو شمېر کارپوهان وايي، دا چې افغانستان له حساس پړاوه تېرېږي، د زلمي خلیلزاد ګمارل دا وخت د افغانستان لپاره د امریکا په بهرنیو چارو وزارت کې د خاص سلاکار په توګه یو پر ځای ګام دی.
خلیلزاد د ۲۰۰۳ تر ۲۰۰۵ میلادي کلونو پورې د افغانستان لپاره د امریکا د سفیر په توګه دنده ترسره کړې او د افغانستان د اساسي قانون په جوړولو کې یې هم مرسته کړې ده.
خلیلزاد چې د افغانستان په شمالي ولایت بلخ کې زېږېدلی، په بیروت کې په امریکایي پوهنتون او د شیکاګو په پوهنتون کې یې لوړې زدهکړې او د جمهوري غوښتونکو د بهرني سیاست د داخلي کړۍ یوه مهره ګڼل کېږي.
په عراق کې د امریکا د سفیر او په ملګرو ملتونو کې د امریکا د استازي په توګهیې هم دندې ترسره کړې دي.
د ولسمشر ټرمپ انتقالي ټیم د بهرنیو چارو د وزیر په توګه د هغه پر ګمارلو هم غور کړی و.
پر امریکا د ۲۰۰۱ میلادي کال د سپټمبر د ۱۱مې له ترورېستي حملو وروسته د امریکا د پخواني ولسمشر جورج بوش د یوه همکار په توګه خلیلزاد پر افغانستان د امریکا د پوځي حملې په پلانولو کې مرسته کړې وه.
هغه حمله چې د القاعده د ځپلو په برخه کې یې نتیجه تر ډېره بریالۍ وه او د طالبانو رژیم تهیې هم د پای ټکی کېښود.
راپور: صفيالله ستانکزی