د ايران ولسمشر به راتلونکې مياشت له خپلو چينايي او روسي سيالانو سره په يوه سرمشريزه کې برخه واخلي.
دا خبره په پيکېنګ کې چارواکو د دوشنبې په ورځ وکړه.
دا په داسې حال کې ده چې دغه مشران هڅه کوي، هغه اټمي تړون وژغوري چې د امريکا ولسمشر ډونالد ټرمپ ورڅخه د واشنګټن د وتلو اعلان وکړ.
چين، روسيه او هغه اروپايي قدرتونه چې د ايران د ٢٠١٥ میلادي کال اټمي تړونيې لاسليک کړى، له دغه تړونه د امريکا د وتلو او پر ايران د بنديزونو د بيا نافذېدو تر اعلان وروسته د دغه تړون د ژغورلو هڅه کوي.
د چين ولسمشر شي جين پېنګ به د ايران له ولسمشر حسن روحاني سره د شانګهاى د همکارۍ سازمان د غونډې په څنډه کې وګوري.
د چين د بهرنيو چارو وزير وانګ يي وايي، په پام کې ده دغه غونډه د چين په ختيځ ښار چینګدائو کې د جون پر ٩مه او ١٠مه وشي.
د وانګيي په خبره ټاکل شوې د روسيې ولسمشر ولادیمير پوتين هم په دې سرمشريزه کې برخه واخلي.
د چين د بهرنيو چارو وزير ونهويل چې د دې سرمشريزې په رسمي اجنډا کې به د ايران پر اټمي تړون بحث هم شامل وي که څنګه؟
د چين د بهرنيو چارو وزارت معين ژانګ هانوي د دوشنبې په ورځ وويل، دا به د ولسمشر په توګه تر ټاکل کېدو وروسته د ولادیمير پوتين اول رسمي سفر وي.
پيکېنګ چې په تجارتي ډګر کې د ايران له مخکښو شريکانو ګڼل کېږي، د ايران د تېلو له سترو پېرودونکو څخه دى او داسې اشارې يې ورکړي چې د امريکا له وروستي اعلان سره سره به د ايران له رژيم سره کار ته ادامه ورکړي.
تمه کېږي په ايران کې د چين تجارت ډېر پراخ شي.
دا کار د امريکايي کمپنيو تر وتلو وروسته د راغلې خلا د ډکولو لپاره کېږي.
ممکن ځيني اروپايي شرکتونه هم د امريکا له مجازاتو د بچ کېدو لپاره له ايران سره خپل تجارت ودروي.
ايران دا مهال د شانګهاى د همکارۍ په سازمان کې د افغانستان، بلاروس او منګوليا په څېر څارونکى غړى دى، خو د دايمي غړيتوب لپارهيې له اوږدې مودې راهيسې هڅه کړې ده.
دغه تړون چې تر ډېره پر امنيتي او تجارتي مسايلو تمرکز کوي، د پخواني شوروي اتحاد څلور غړي هېوادونه هم پهکې شامل دي.
پاکستان او هندوستانيې نوي غړي دي.
