اسرائیل پر سوریې د درېیو لوېدیځو هېوادونو له حملې وروسته، په سوریه کې د ایران د حضور په اړه خبرداری ورکړی دی.
د اسرائیل صدراعظم بنیامین نتانیاهو وايي، پر سوریې د حملې پیغام دا دی چې نړیواله ټولنه د کیمیاوي وسلو او د غیرمتعارفو وسلو د نورو ډولونو د کارولو په وړاندې هېڅ راز زغم نه لري.
د اپرېل په څلورمه دمشق ته نېږدې د سوریې په دوما ښار کې د کیمیاوي وسلو په یوه حمله کې د ملکي وګړو له مړینې وروسته، امریکا، بريتانیا او فرانسې د شنبې په ورځ سهار وختي پر سوریې په ګډه حمله وکړه.
پنټاګون ویلي چې په دې حملو کې د سوریې د کیمیاوي وسلو درې کارخانې په نښه شوې.
نتانیاهو مخکې له دې هم پر سوریې له حملو څخه خپل ملاتړ اعلان کړی و.
هغه د یکشنبې په ورځ د کابینې غونډې ته وویل چې پر سوریې د حملې په شپه یې د بريتانیا له صدراعظمې تریزا مې سره خبرې وکړې او ورته ویې ویل چې دا پالیسي د نورو ترورېستو هېوادونو او ډلو په برخه کې هم باید عملي شي، څو د اټمي وسلې د ترلاسه کولو لپاره د هغوی د هڅو مخنیوی وشي.
د اسرائیلو صدراعظم چې د ایران د فعالیتونو په اړه یې مخکې هم خبرداری ورکړی، یوځل بیا ټینګار وکړ چې باید ایران ته په سوریه کې د پوځي حضور اجازه ور نه کړل شي.
اوه ایراني سرتېري د هغو ۱۴ پوځیانو په ډله کې وو چې د تېرې دوشنبې په ورځ د سوریې پر T-4 هوايي اډې په بمبارۍ کې ووژل شول.
د سوریې د رژیم متحدانو، روسیې او ایران د دې حملې پړه پر اسرائیلو واچوله، خو اسرائیلو دا تور نه رد کړی او نه یې تأیید کړی دی.
نتانیاهو زیاته کړه، ده د بريتانیا صدراعظمې ته وویل چې ولسمشر اسد باید پوه شي چې ایران او د ایران لاسپوڅو ته په سوریه کې د پوځي حضور په برابرولو سره خپل هېواد او د سیمې ثبات له خطر سره مخامخ کوي.
له نتانیاهو مخکې د اسرائیلو د کابینې دوو غړو هم ویلي وو چې اسرائیل به ایران ته په سوریه کې د پوځي حضور اجازه ور نه کړي.
اسرائیلو د سوریې په کورنۍ جګړه کې له مستقیم دخالت څخه ډډه کړې ده، خو اعتراف کوي چې د لبنان شیعه وسله والو او د اسرائیلو نورو دښمنو ډلو ته د پرمختللو وسلو د لېږد د مخنیوي لپاره یې څو ځلې هوايي حملې کړې دي.
حزب الله هم د ایران او روسیې په څېر د سوریې په کورنۍ جګړه کې د اسد د رژیم ملاتړ کوي.