ایران د امریکایي ډالر په وړاندې د خپلې پیسې د ارزښت د لا ټيټېدو د مخنیوي لپاره یو لړ نوي اقدامات کړي دي.
چارواکو وویل چې سرله ننه به حکومت پر ټولو، عادي وګړو او سوداګرو یو شان یو ډالر د ۴۲ زره ریالو په مقابل کې پلوري.
د ایران مرستیال ولسمشر اسحاق جهانګیري د دوشنبې د ورځې په وروستیو کې د کابینې له بېړنۍ غونډې وروسته وویل چې دغه اقدام به د ډالر د رسمي او مارکېټ د بیې د یو کولو لپاره اغېزمن وي.
جهانګیري وویل، له ۴۲ زره ریالو زیات که یو ډالر چا تبادله کړ، هغه به قاچاق وانګېرل شي او جدي قانوني چلند به ورسره وشي.
دغه اقدام وروسته له هغې کېږي چې د راپورونو له مخې، ریال د دوشنبې په ورځ نور هم راولوېد او په ازاد مارکېټ کې ۶۰ زره د یوه ډالر په مقابل کې تبادله شو.
امریکایي ډالر شااوخوا اوه میاشتې مخکې د تېرکال د سپټمبر په نیمايي کې له ۳۶ زره ریالو سره تبادله کېده.
په وروستیو کې ریال د ډالر په مقابل کې خپل ارزښت تر ډېره د هغو اندېښنو له کبله چې ګواکې د امریکا متحده ایالات به د نړۍ له قدرتونو سره د ایران د ۲۰۱۵ میلادي کال له اټمي تړونه ووځي، له لاسه ورکړی دی.
د ایران مرستیال ولسمشرغیراقتصادي، غیرموجه او د نه وړاندوینې وړ عوامل، د ریال د ارزښت د ټیټېدو ترشاه عمده دلایل وبلل چې د ده په وینا، هدف یې د ریال سقوط دی.
هغه زیاته کړه چې په وروستیو اوونیو کې د هېواد د صادراتو د عوایدو له درکه، د لسګونو ميلیاردو ډالرو په ارزښت بهرني اسعار، ایران ته داخل شوي دي.
د جهانګیري په وینا، د ایران دښمنان او مخالفین په تېره امریکایان، له هغې راهیسې چې اټمي تړون شوی، ډېره هڅه کوي چې د ایران اقتصاد بې ثباته کړي او هغوی چې له ایران سره معاملې کوي، له دې کاره را وګرځوي.
د ایران د حکومت ویاند محمد باقر نوبخت د سې شنبې په ورځ وویل چې ایران د صادراتو عمدتاً د اومه تېلو او ګازو له درکه په کال کې د شااوخوا ۹۵ ميلیاردو ډالرو په ارزښت عواید ترلاسه کوي، حال دا چې واردات مو په کال کې ۸۰ ميلیارده ډالر دي.
د نوبخت په وینا، ایران په یوه اقتصادي جګړه کې ښکېل دی او دښمنان یې هم هڅه کوي چې اقتصاد ته مو ستونزې را ولاړې کړي.