افغان ولسمشر وايي، ټاپي پروژه شاملو هېوادونو ته کار، عايد او برښنا راوړي.
محمد اشرف غني دا څرګندونې نن جمعه په هرات ولايت کې د ټاپي پروژې د افغانستان د برخې د کار په پرانېست غونډه کې وکړې.
په دغو مراسمو کې د هندوستان، پاکستان او ترکمنستان د حکومت استازو هم برخه درلوده.
افغان چارواکو د دغې سترې پروژې د امنیت ډاډ ورکړی.
طالبانو هم د یوې خبرپاڼې په خپرولو سره د ټاپي د پروژې ملاتړ کړی او ویلي یې دي چې دا یوه ملي پروژه ده او ګټه یې ټولو خلکو ته رسېږي.
افغان چارواکي وايي، د ټاپي په چوکاټ کې د ګاز پر لېږدولو سربېره د افغانستان، پاکستان او هند لپاره د ترکمنستان د ۵۰۰ کیلو ولټه برښنا، په هرات، فراه او کندهار ولایتونو کې د برښنا سب سټیشنونه، نوري فایبر او د اوسپنې د پټلۍ پروژې هم شاملې دي. تمه ده چې دا پروژه به د ۲۰۱۹ میلادي کال په پای کې بشپړه شي.
د ټاپي د ګاز نل لیکه ۱۸۱۴ کیلومتره ده چې ۷۳۵ کیلومتره یې په افغانستان کې او له هرات، فراه، نیمروز، هلمند او کندهار ولایتونو تېرېږي.