اسوشيټېډ پرېس خبري اژانس د جمعې په ورځ راپور ورکړی چې څېړنې يې ښيي، د هککرانو يوې ډلې چې فينسي بيېر نومېږي، د تر ۲۰۰ زیاتو خبريالانو، خپروونکو او بلاګرانو پر جيمېل ایمېلونو حملې کړي وې.
د سايبري امنيت د یوه شرکت سيکيور ورکس د معلوماتو او له ۴۰ خبریالانو سره د مرکو له مخې، اسوشيټېډ پريس وايي، د ۲۰۱۴ میلادي کال په نيمايي کې هککرانو خپلې حملې پيل کړې او تر وروستیو څو مياشتو يې دوام وکړ.
روسۍ مقاله لیکونکي ناتاليا ګيورکيان دا معلومات ليدلي او اسوشيټېډ پرېس ته يې ويلي، د هککولو دا کمپاین داسې ښکارېده، لکه د خلکو شخصي معلومات چې ټولوي چې وروسته یې د فشار د الې په توګه وکارولای شي.
د امریکا استخباراتي ټولنې ويلي چې فینسي بيېر د روسي حکومت د دستور لهمخې د امریکا په انتخاباتو کې لاسوهنه کړې. روسيې دا تور رد کړی دی.
په ۲۰۰ خبریالانو کې شاوخوا ۵۰ امریکايي تبعه نهدي.
د نیويارک ټایمز د مسکو څانګې مشر ايلن باري هم په دغو خبریالانو کې شامل دی.
د اسوشيټېډ پرېس د راپور له مخې، د باري د دفتر شاوخوا ۵۰ همکاران هم د فینسي بیېر لهخوا په ۲۰۱۴ میلادي کال کې په نخښه شوي وو.
اسوشيټېډ پرېس ويلي چې فینسي بيېر د ادريان چين په نوم روسی خبریال هم په نخښه کړی دی.
د انټرنيټ د څېړنيزې ادارې په اړه د چين راپور د روسیې له هغه پلانه پرده پورته کړه چې پر ټولنيزو رسنيو يې د امریکايانو جعلي اکاونټونه جوړ کړي وو.
ډېری روسي خبریالان چې دغو هککرانو په نخښه کړي، وايي له مخکې يې لاامنيتي تدابیر نيولي وو او خپلو اکاونټونو ته يې دوه پاسورډه ورکړي وو.