- واشنګټن پوسټ
واشنګټن پوسټ ورځپاڼې په افغانستان کې د پوځیانو د یوې نوې ډلې په جوړولو یو مطلب لیکلی دی.
د دغه مطلب په سر کې راغلي چې ایا په افغانستان کې د محلي ملېشو خوځښت د ترهګرۍ پر ضد اغېزمنه حل لاره ده؟
واشنګټن پوسټ لیکلي:
د امریکا د اردو پالېسي جوړونکي په دې وروستیو کې په افغانستان کې د سیمهییزو ځواکونو د یوې اردو د جوړولو لپاره وړاندیز کړی چې وکولای شي له افغان او امریکايي پوځیانو ملاتړ وکړي.
د افغانستان جمهور رئیس محمد اشرف غنې د دغو وړاندیزونو پر سر غور کوي.
د ورځپاڼې په باور په اوږدمهال کې به د محلي ځواکونو استخدام هغه هم د هغوی د خپلو مېنو د دفاع په هدف د لانجمنو پولو د خوندي ساتلو لپاره یوه کم لګښته لار وي.
واشنګټن پوسټ لیکي چې سیمهییزې ملېشې به د ترهګرو د هستوګنې په اړه مهم استخباراتي معلومات شریک کړای شي او هم به له ملکیانو سره د بېځایه تاوتریخوالي په مخنیوي کې مرسته وکړي.
په افغانستان کې د محلي ملېشو خوځښت د ترهګرۍ پر ضد اغېزمن حل لاره ده؟
خو واشنګټن پوسټ دا اندېښنه هم شریکه کړې چې ځیني وخت د ترهګرو د پېژندلو لپاره له ملکیانو استفاده به ترهګرې ډلې وپاروي او په حقیقت کې به د ملکیانو پر ضد تاوتریخوالی لا پسې زیات کړي.
- لاس انجلس ټایمز
په افغانستان کې د امریکا هوايي بریدونه ډېر زیات شوي او د ملکیانو مرګژوبله هم ورسره لوړه تللې.
دا د لاس انجلس ټایمز ورځپاڼې د یوه مطلب عنوان دی.
د مطلب د لیکوال په خبره جنګي الوتکو د افغانستان په ختیځ کې د هغو کلیو په سر پرواز کاوه چې د اسلامي دولت ډلې سختدریځه پهکې پټ و.
۱۱ تنه د قریبالوقوع بمبارۍ له ډاره له سیمې د تېښتې په حال کې و چې سوزوکي سپین رنګه موټر یې د یوې چاودنې هدف وګرځېد.
لاس انجلس ټایمز لیکلي چې د چاودنې په نتیجه کې په سړک کې یوه کنده رامنځته او سوزوکي موټر لاندې درې ته ورغړېد.
د ورځپاڼې په مطلب کې راغلي چې یوه ځوانه نجلۍ ژوندۍ پاتې شوه او ۱۰ تنه نور چې درې ماشومان هم پهکې شامل و، ووژل شول.
یوه نوي زېږیدلي ماشوم د خپلې مور په غېږ کې ساه ورکړه.
لاس انجلس ټایمز لیکي:
د اګسټ په ۱۱مه په ننګرهار کې له دې پېښې یوازې یو روغ کس ووت او افغان چارواکو هم چې سیمه کتلې، ویلي یې دي چې سوزوکي وړه لارۍ د ماښام له پنځو مخکې د امریکايي ځواکونو په هوایي برید کې لګېدلې ده.
د امریکا پوځ له پېښې وروسته په یوه بیان کې تائید کړه چې برید یې کړی، خو هغه سختدریځې په نښه شوي چې په یوه موټر کې يې وسلې بارولې.
د امریکا د پوځ په بیان کې ویل شوي چې په پېښه کې ملکیان نهدي ویشتل شوي.