د امریکا په کانګرس کې د جمهوري غوښتونکو مشرانو ویلي، یوه داسې توافق ته رسېدلي چې د روسیې پر ضد د نویو بندیزونو د لایحې اجرا کېدو ته لار هواروي او هم د دغو بندیزونو په کمولو کې د ولسمشر ډونالد ټرمپ صلاحیت کمولی شي.
دا لایحه په نېږدې ټول اکثریت سره د جولای پر ۲۵مه د امریکا د ولسي جرګې لهخوا تصویب شوه او بیا یې د سنا مجلس ته واستوله.
په سنا مجلس کې دا لایحه د هغو غړو لهخوا له مقاومت سره مخامخ شوه چې هغوی د سنا مجلس په اصلي لایحه کې د شمالي کوریا د بندیزونو د ضمیمه کېدو مخالف وو.
د سنا په لایحه کې یوازې پر روسیې او ایران تمرکز شوی و.
د سنا مجلس د بهرنیو اړیکو د کمېټې مشر باب کورکر «Bob Corker» د کانګرس له مشرانو سره تر یوې ورځې بحثونو وروسته ویلي:
"زه پهدې اعلان خوښ یم چې موږ یوې موافقې ته ورسېدو چې کولای شو د بندیزونو دغه مصوبه ولسمشر ته واستوو."
د ورځې په اوږدو کې د شمالي کوریا په وړاندې د بندیزونو سره د مقاومت مسئلې لومړی د دې لایحې د برخلیک په اړه شکونه راپورته کړل، خو پرون د ورځې په وروستیو کې باب کورکر وایي چې ده خپل مخالفت بېرته واخیست.
که چېرې دا لایحه توشېح شي نو هغه بندیزونه چې د امریکا د پخواني ولسمشر بارک اوباما د ادارې پر مهال پر روسیې لګېدلي وو، په قانون بدلېږي.
پهدې لایحه کې یوه داسې ماده هم شته چې که سپینه ماڼۍ وغواړي د روسیې پر وړاندې هر ډول بندیزونه کم کړي، نو پرېکړه بهیې د کانګرس تائید ته اړتیا ولري.
سره لهدې چې سپینه ماڼۍ پهدې مقرره کې بدلون غواړي، خو لا تر اوسهیې نهدي ویلي چې ګواکې سپینه ماڼۍ به دا لایحه ویټو کړي.
سپینې ماڼۍ په ټوله کې ویلي چې د روسیې، شمالي کوریا او ایران پر وړاندې د سختو بندیزونو پلوي کوي.
په همدې حال کې د روسیې د بهرنیو چارو وزارت مرستیال سرګي ریابکوف پرون انټرفاکس خبري اژانس ته ویلي و چې دا لایحه په سیاسي او ډیپلوماتیکو چارو کې د دواړو هېوادونو ترمنځ ستونزې پیدا کولای شي.
بلخوا د روسیې د ولسمشر ویاند ډیمیتري پېسکوف د چهارشنبې په ورځ خبریالانو ته ویلي و:
"د دې لایحې په اړه چلند به د یوه بشپړ تحلیل پر اساس جوړېږي او دا پرېکړه چې هغې ته به څه ډول غبرګون ښودل کېږي، یقیناً د هېواد د مشر ولادیمیر پوتین لهخوا کېږي."
دغهراز د ایران ولسمشر هم د سې شنبې په ورځ دې تصمیم ته غبرګون ښودلی او ویلي یې دي چې دا د ایران او د نړۍ د سترو قدرتونو ترمنځ د لاسلیک شوي تړون له موادو څخه سرغړونه ده.
نوموړي ویلي:
"که دښمن د تړون له څو برخو سرغړونه کوي، موږ بهیې څو برخې له پامه وغورځوو. که دوی د ټول تړون څخه سرغړونه کوي، موږ به هم ټولې ژمنې تر پښو لاندې کړو."
په کانګرس کې د دواړو مجلسونو لهخوا د دغې لایحې پراخ ملاتړ پر ولسمشر ډونالد ټرمپ فشار راوړي چې دا لایحه توشېح کړي.
د ولسمشر ټرمپ اداره د هغو ادعاوو له کبله چې ګواکې روسیې د امریکا په انتخاباتو کې د ټرمپ په ګټه لاسوهنه کړې ده، تر فشار لاندې دی.
