د ایران او پاکستان په ګډه پوله د لسو پوله ساتو ایراني ځواکونو وژنې د دواړو هېوادونو اعتراض پارولی دی.
ډان انلاین خپرونې لیکلي چې پاکستاني چارواکو د ایران هغه اعتراض بې ځایه بللی چې لس سرتېري یې مخالفینو ور وژلي دي.
هغه مخالفین چې د ایران په باور په دننه پاکستان کې فعاله دي.
د پاکستان د بهرنیو چارو وزارت په یوه بیان کې ویلي چې د صدراعظم نوازشریف خاص مرستیال سیدطارق فاطمي د ایران له سفیر سره په خبرو کې د څو تنو ایراني پوله ساتو ځواکونو په وژنې خواشیني وښوده.
د بیان له مخې ښاغلي فاطمي همدا راز ایراني سفیر ته ډاډ ورکړ چې په پوله باندې د امنیت د لا ټينګښت لپاره هر ډول همکارۍ ته چمتو دی او د سرتېرو د وژنې د پېښې د څېړنې لپاره به اړونده ادارې په تماس کې وي.
د ایران لس پوله ساتي ځواکونه د چهارشنبې په ماښام د سیسټان بلوچستان ایالت د مرجاوې ښار په سرحدي سیمو کې د ګزمې پر مهال وژل شوي دي.
د پاکستان د بهرنیو چارو وزارت ویاند نفیس ذکریا هم په اوونیزه خبري غونډه کې پرون وویل چې پېښه د ایران په خاوره کې شوې او پاکستان پرې خواشینی دی.
د پاکستان د بهرنیو چارو وزارت ویاند نفیس ذکریا وویل:
"ترکومه ځایه چې زه پوهېږم هغه دا دي چې دا پېښه د ایران په خاوره کې شوې ده. نو زه ډېر معلومات نه پرې لرم یوازې همدومره چې دا د ایران په خاوره کې شوې ده. خو د انسان وژل کېدل داسې یو څه دي چې نه یوازې موږ یې غندو بلکې له هغو سره هم خپله خواخوږي څرګندوو چې خپل عزیزان یې له لاسه ورکړي دي."
د ایران د پوله ساتو ځواکونو د وژنې مسؤلیت د جېش العدل وسلهوالې ډلې په غاړه اخېستی دی.
د ایران او پاکستان تر منځ سرحدي لانجې تل د دواړو هېوادونو په اعتراضونو تمامېږي خو دا ځل ایراني چارواکو د پاکستان په وروستیو لویو سیاسي او پوځي دریځونو انتقاد کړی دی.
د ایران پریس ټي وي ټلویزیون د دغه هېواد د بهرنیو چارو وزارت د ویاند بهرام قاسمي په حواله ویلي چې د پاکستان حکومت باید په خپله خاوره کې د مخالفو ګروپونو د موجودیت او فعالیت په اړه ځواب ویونکی و اوسي.
هغه د سعودي په مشرۍ په یمن کې د حوثي یاغیانو د ځپلو په خاطر په جوړ شوي ائتلاف کې د پاکستان ګډون ته اشاره وکړه.
د بهرام قاسمي په خبره:
"هغه هېوادونه چې د ترورېزم ضد ائتلافونو غړیتوب لري څنګه په خپله خاوره کې د تروریستي ګروپونو او وسلهوالو ډلو په ځپلو نه برلاسي کېږي؟"
پاکستان خپله خاوره کې د مخالفو ډلو پر ضد د عملیاتو د جاري ساتلو خبره یاده کړې او ویلي یې دي چې هند او افغانستان دغه ډلې تمویلوي؛ هغه څه چې افغان او هندي چارواکي یې له تروریستانو د پاکستان د ملاتړ د پټولو هڅه بولي.
صفي الله ستانکزی