د پاکستان پوليسو د دوو ملايانو د پاروونکو ويناوو په اړه څېړنې پيل کړې دي.
د پاکستان دغه دوه ملايان په دې تورن دي چې هڅهيې کړې د پوهنتون د وژل شوي محصل مشال خان د جنازې مراسم ګډوډ کړي.
مشال خان د شمالي ښار مردان د عبدالولي خان پوهنتون محصل و او نورو محصلانو د پنجشنبې په ورځ د پوهنتون په انګړ کې دننه اسلام ته د سپکاوي په تور په وهلو ډبولو وواژه.
دوى پر مشال خان تور پورې کړى چې پر ټولنيزو رسنيو يې اسلام ته سپکاوى کړى دى.
خو د مشال خان پلار اقبال سحر دا تورونه ناسم بللي او وايي، زوی یې هېڅکله داسې کومه خبره نهده کړې.
په پاکستان کې چې اکثريت اوسېدونکي يې مسلمانان دي، مقدساتو ته سپکاوى ډېره حساسه موضوع ده چې تورن کس د مرګ له سزا سره مخامخېداى شي.
د دغه هېواد په زندانونو کې لسګونه کسان په دې تور د مرګ د سزا انتظار باسي.
د روېټرز اژانس په حواله پاکستان کې له ١٩٩٠مو کلونو راهيسې لږ تر لږه ٦٥ کسان مقدساتو ته د سپکاوي په تور وژل شوي دي.
تر پېښې وروسته ځينې محصلان او نور کسان چې ګومان کېږي د مشال خان په وژنه کې دخيل وو، نيول شوي دي.
د خېبر پښتونخوا د پوليسو مشر صلاحالدين محسود د دوشنبې په ورځ وويل، د مشال خان د وژنې د قضيې په تړاو تر شلو زيات کسان نيول شوي او په هغوى کې د پوهنتون شپږ تورن کارکوونکي هم شامل دي.
د پاکستان د سترې محکمې قاضيالقضات د يکشنبې په ورځ د مشال خان د وژنې د قضيې په اړه د خېبر پښتونخوا د پوليسو مشر ته امر کړى و چې په ٣٦ ساعتونو کې دننه دې په دې اړه خپل معلومات ورسره شريک کړي.
په همدې حال کې د مردان د پوليسو مشر علم شينواري ويلي نيول شوي کسان به د ترورېزم ضد محکمو لهخوا محاکمه شي.
په بنو کې هم د مشال خان په پلوي مظاهره شوې ده.
ګډونوالو يې ويل چې د مشال خان لپاره انصاف غواړي.
پوليس وايي، د مشال خان په پلرني ټاټوبي صوابۍ کې د هغو ملايانو په اړه هم تحقيقات کوي چې هڅهيې کړې د مشال خان د جنازې مراسم ګډوډ کړي او د مشال خان د کورنۍ په بابيې کرک-پاروونکې څرګندونې وکړې.
د صوابۍ اوسېدونکي سلمان احمد ويلي چې د جمعې په ورځ يوه ځايي ملا امام د مشال خان د جنازې د لمانځه له ورکولو انکار وکړ، خو هغه کس چې د خلکو په غوښتنهيې د ملا امام پر ځاى د جنازې لمونځ ورکړ، وروسته د ګڼو کسانو له جنجالونو سره مخامخ شو.
د پاکستان صدراعظم نواز شريف هم د مشال خان وژنه غندلې او ويلي يې دي چې په پېښه کې دخيل کسان به هرو مرو خپله سزا ويني.