که څه هم د اقتصادي چارو یو شمېر کارپوهان وايي چې د افغانستان او پاکستان ترمنځ د لارو تړل خلک له جدي ستونزو سره مخ کړي خو اجرائیه ریاست وايي، افغانستان اوس یوازې پر پاکستان متکي نهدی.
د اجرائیه ریاست ویاند مجیب الرحمان رحیمي د پنجشنبې په ورځ یوې خبري ناستې ته وویل چې د پاکستان له لوري د لارو تړل د افغانستان په پرتله پاکستان ته ډېر زیان رسولی دی.
د ښاغلي رحیمي په خبره له ایران او د منځنۍ اسیا له هېوادونو سره د افغانستان سوداګریزې راکړې ورکړې تر ډېره د افغانانو اړتیاوې پوره کړي دي.
نوموړی وايي:
"اجرائیه رئیس د لارو د تړلو په اړه له مسؤلو چارواکو سره ناسته لرله، هغوی دې ناسته کې وویل چې له ایران او د منځنۍ اسیا له هېوادونو سره د افغانستان سوداګریزه راکړه-ورکړه په بې ساري ډول زیاته شوې او په تېر کې هغه له حده زیاته اتکا چې د پاکستان پر لارو مو لرله اوس کمه شوې ده. "
دا په داسې حال کې ده چې پاکستان له تېرې یوې میاشتې راهیسې خپلې خاوره کې د ترهګریزو بریدونو په غبرګون کې د تورخم او سپینبولدک لارې تړلي دي.
که څه هم اجرائیه ریاست وايي چې افغانستان اوس د پاکستان بدیلې لارې لري خو بیا هم تمه ښيي چې پاکستان د لندن له ناستې په استفادې د ستونزې د حل هڅې وکړي.
د افغانستان، انګلستان او پاکستان ترمنځ درې اړخېزه ناسته د یادو هېوادونو د ملي امنیت د سلاکارانو په حضور د چهارشنبې په ورځ لندن کې ترسره شوه.
که څه هم د یادې ناستې تمرکز تر ډېره پر امنیتي مسایلو و، خو وړاندې د ملي امنیت شورا ویلي وو چې د افغانستان او پاکستان ترمنځ د روان کړکېچ او د لارو د بندېدو مسئلې به هم په دغه ناسته کې مطرح شي.
د اقتصادي چارو یو شمېر کارپوهان بیا وايي، د کابل او اسلاماباد ترمنځ د کړکېچ دوام او په ځانګړي توګه د لارو تړل هېڅ لوري ته ګټه نه رسوي.
د سوداګرۍ پخوانی وزیر او اقتصادي کارپوه محمد امین فرهنګ د حکومت هغه ادعا هم چې ګواکې افغانستان اوس پر پاکستان دومره اتکا نهلري ناسمه بولي او وايي چې د لارو په تړلو هېوادوال له جدي ستونزو سره مخامخ شوي دي.
ښاغلي فرهنګ زیاته کړه:
"د توکو قاچاق زیات شوی او هر هېواد کې چې د خوراکي او د اړتیا وړ توکو قاچاق زیات شي د توکو د قیمت تشکل چې د بازار وظیفه ده د قاچاقبرانو لاس ته لوېږي او مشکلات ډېرېږي."
د ښاغلي فرهنګ په خبره لا هم هغه لارې چې د پاکستان د لارو بدیل وګرځي نهدي فعاله شوي نو ځکه افغانان ډېر زیانمنونکي دي.