پاکستان به راتلونکې اوونۍ د اقتصادي همکارۍ سازمان د غونډې کوربه وي.
د اقتصادي همکارۍ سازمان ۱۳مه غونډه به د مارچ مېاشتې په لومړۍ نېټه په اسلاماباد کې وشي.
دا سازمان چې د پاکستان، ایران او ترکیې په ابتکار جوړ شوی وو، اوسمهال ۱۰ غړي لري.
د پاکستان د بهرنیو چارو وزارت پرون شنبه وویل چې د اقتصادي همکارۍ سازمان زیاتو غړو اسلاماباد کې راروانې غونډې ته د ورتګ بلنه منلې خو د افغانستان د ګډون په اړهيې په زغرده څه نهدي ویلي.
د امریکا غږ انګلېسي برخې په یوه راپور کې د پاکستان د صدراعظم سلاکار سرتاج عزیز په حواله ویلي چې د افغانستان د بهرنیو چارو وزیر صلاحالدین رباني دې غونډې ته ورځي.
د امریکا غږ د راپور په حواله، سرتاج عزیز ویلي چې د افغانستان د بهرنیو چارو وزارت په دې غونډه کې د صلاحالدین رباني ګډون تائید کړی.
امریکا غږ وايي، سرتاج عزیز پرون شنبه په اسلاماباد کې خبريالانو ته ویلي چې افغانستان او پاکستان ترورېزم خپل ګډ دښمن ګڼي او له دې سره د مبارزې لپارهیې د دوه اړخېزې همکارۍ پر اړتیا توافق کړی دی.
د راپور په حواله، سرتاج عزیز همدا راز ویلي چې د اقتصادي همکارۍ سازمان د غونډې په څنډه کې به له ښاغلي رباني سره د ترورېزم پر ضد د مبارزې په اړه جلا خبرې هم وکړي.
سرتاج عزیز زیاته کړې چې دواړه به له ترورېزم سره د ګډې مبارزې لپاره د یوه نوي مېکانیزم پر جوړولو وغږېږي.
موږ له مکررو هڅو سره ونهتوانېدو چې په دې اړه د افغانستان د بهرنیو چارو وزارت نظر ترلاسه کړو.
خو یو شمېر پاکستاني رسنیو ویلي چې افغانستان لا په اسلاماباد کې په دې غونډه کې د خپلو استازو ګډون نهدی تائید کړی.
د اقتصادي همکاریو سازمان په ۱۹۸۵ میلادي کال کې پاکستان، ایران او ترکیې جوړ کړ چې وروستهیې افغانستان، تاجکستان ، ازبکستان، قرغزستان، قزاقستان، ترکمنستان او اذربایجان هم غړي شوو.
د دې سازمان د جوړېدو موخه له نړیوال اقتصاد سره د دې هېوادونو د اقتصادي پیوستون پیاوړي کول وو.
په اسلاماباد کې د اقتصادي همکاریو سازمان غونډه په داسې حال کې جوړېږي چې د افغانستان او پاکستان تر منځ سیاسي روابط، تر بل هر وخت زیات نازک حالت ته رسېدلي دي.
په پاکستان کې تر یو لړ چاودنو او وسلهوالو حملو وروسته، د پاکستان حکومت پر تورخم او سپینبولدک د افغانانو تګ راتګ بند کړ.
د پاکستان صدراعظم نواز شریف تېره اوونۍ ترکیه کې د هغه هېواد له صدراعظم سره تر کتنې وروسته، وویل چې اسلاماباد په افغانستان کې د سولې ټینګښت غواړي خو ټینګار یې وکړ چې د افغانستان له خاورې د پاکستان پر ضد کار اخیستل کېږي.
خو د افغانستان حکومت دا ادعا رد کړې ده.
کابل ویلي چې هېڅکلهیې د ترورېستي ډلو ملاتړ نهدی کړی او د داسې تورونو پورې کول د وضعیت له ښه کېدو سره هېڅ ډول مرسته نهشي کولای.