په ملګرو ملتونو کې د امریکا نوې سفیرې نیکي هیلي Nikki Haley په اوکراین کې د روسیې اقدامات په کلکه غندلي دي او خبرداری یې ورکړی چې پر مسکو لګیدلي بندیزونه به تر هغه وخته لېرې نهشي چې کریمیا ټاپو وزمه بېرته اوکراین ته سپارل شوې نه وي.
مېرمن هیلي چې له لوړې وروسته د لومړي ځل لپاره د ملګرو ملتونو د امنیت شورا په غونډه کې خبرې کولې ټینګار وکړ چې کریمیا د اوکراین خاوره ده.
نوموړې وايي:
"د روسیې د تشدد له اقداماتو یوازې د اوکراین ختیځ نهدی زیانمن شوی. متحدایالات د دې تشدد غندلو ته دوام ورکوي او پر روسیې غږ کوي چې سمدستي د کریمیا اشغال پای ته ورسوي. پر روسیې لګول شوي بندیزونه به تر هغه وخته پرځای پاتې وي چې د کریمیا اداره یې بېرته اوکراین ته سپارلي نه وي."
مېرمن هیلي همدا راز وویل چې امریکا له روسیې سره ښه اړیکې غواړي خو یادونه وکړه یې چې د اوکراین د ختیځ روان حالت ته په پام سره په دې سیمه کې د روسیې اقدامات باید وغندل شي.
روسیې د ۲۰۱۴ کال په مارچ میاشت کې کریمیا ته د پوځي ځواکونو له استولو او ټولپوښتنې وروسته دا ټاپو وزمه له خپلې خاورې سره ضمیمه کړه.
د روسیې دا اقدام اوکراین او د نړۍ ۹۹ هېوادونو وغانده.
مسکو همدا راز د اوکراین په ختیځ کې د دولتي ځواکونو او وسلهوالو مخالفینو ترمنځ له ۲۰۱۴ کال راهیسې په پیل شويو جګړو کې د روس پلوو بیلتونپالو د ملاتړ له کبله د لویدیځ له سختو انتقادونو سره مخامخ دی.
د اوکراین په ختیځ کې د جګړو له پیله تردې دمه نېږدې ۱۰ زره کسان وژل شوي دي.
د امریکا نوي ولسمشر ډونالډټرمپ د انتخاباتي کمپاین پرمهال له روسیې سره د اړیکو د ښه کولو ژمنه کړې وه او ویلي یې و، که روسیه له امریکا سره همکاري وکړي نو پردې هېواد د بندېزونو دوام ته به اړتیا نه وي خو له لوړې وروسته یې وویل، پر روسیې د بندیزونو د لغو کولو په اړه خبرې له وخته مخکې دي.
اوکراین اندیښنه لري چې د ټرمپ اداره ښايي پر مسکو ځینې لګیدلي بندیزونه لېرې کړي.
د اوکراین ولسمشر پیټرو پروشینکو له نړیوالې ټولنې غوښتي دي چې پر مسکو فشارونه زیات کړي.