د سعودي عربستان د کورنیو چارو وزارت وايي چې په دې هېواد کې یې د ۱۳ پاکستانیانو په ګډون ۱۶ کسان د ترهګرۍ په تور نیولي دي.
د یاد وزارت چارواکو د سې شنبې په ورځ پر خپلې ټویټرپاڼې لیکلي چې د ترهګرۍ په تور په نیول شویو دغو ۱۶ کسانو کې درې ۳یې سعودیان او نور ټول پاکستانیان دي.
د سعودي عربستان چارواکي وايي چې دغه کسان د امنیتي څواکونو په عملیاتو کې نیول شوي، خو تر دې دمهیې لا د دغو کسانو نومونه نهدي څرګند کړي.
د سعودي عربستان امنیتي چارواکو دا کسان تر هغې وروسته د ترهګرۍ په تور نیولي چې د شنبې په ورځ د سعودي عربستان په جده ښار کې د امنیتي ځواکونو او مشکوکو وسلهوالو تر منځ نښته شوې وه چې بیا وروسته دوو مشکوکو بریدګرو په ځان پورې تړلي باروتي مواد الوزولي وو.
د سعودي عربستان د بهرنیو چارو وزارت د وینا له مخې، تر طبي معایناتو وروسته معلومه شوې چې وژل شوي کسان سعودیان وو چې یو یې غازي حسین السرواني او بل ندي مرزوق المضیاني نومېدل.
د کورنیو چارو وزارت همدا شان پر خپلې ټویټرپاڼې له مشکوکو ترهګرو څخه د ترلاسه شویو وسلو، لاسي بمونو او باروتو انځور هم خپور کړی دی.
په دې وروستیو کې د سعودي عربستان په بېلابېلو ښارونو کې ترهګریز بریدونه شوي چې ګڼ شمېر کسانو تهیې مرګ ژوبله هم اړولې ده.
د سعودي چارواکو په خبره، په دغو ترهګریزو بریدونو کې ځینو پاکستانیانو هم برخه درلوده چې له ډلې یې یوه په تېر ۲۰۱۶ میلادي کال کې په جده ښار کې یوه جومات ته څېرمه ځانمرګی برید کړی و.
د یادونې وړ ده چې د سعودي عربستان چارواکو تر دې مخکې هم په دې هېواد کې د عملیاتو پر مهال د یو شمېر مشکوکو پاکستانیانو د نیولو خبر ورکړی دی.
راپور: ذبیح مومند