د پاکستان پولیسو نن هغه ۱۵۰ کسان ونیول چې غوښتل يې په لاهور کې د کفر ویلو د منع د قانون په ملاتړ مظاهره وکړي.
نیول شوي کسان د تحریک لبیک یا رسولالله سخت دریځه ډلې غړي دي.
په لاهور کې د کفر ویلو د منع د قانون خلاف دا مظاهره په داسې وخت کې پلان شوې وه چې هم نن پر دې قانون د انتقاد له امله د پنجاب د پخواني والي سلمان تأثیر د وژلو ۶ کال پوره کېږي.
سلمان تأثیر له نن څخه ۶ کال وړاندې د هغه د یوه ساتونکي ممتاز قاداري لهخوا په ډزو ووژل شو.
سلمان تأثیر د کفر ویلو د قانون له مخې د یوې مسیحې مېرمن د محکومېدو له امله انتقاد کړی و او په دې قانون کې يې د اصلاحاتو غوښتنه کوله.
د پاکستان تېرکال د سلمان تأثیر وژونکی ممتاز قادري اعدام کړ خو د هغه زرګونو ملاتړو د هغه په جنازه کې ګډون وکړ او هغه يې اتل وباله.
رویټرز خبري اژانس د عیني شاهدانو په حواله وايي چې د کفر ویلو د منع د قانون ملاتړو پر پولیسو د ډبرو ګذارونه وکړل.
د لاهور پولیسو ویلي دوی ته معلومات رسیدلي وو چې د لشکر لبیک یا رسولالله ډله غواړي د مظاهرې له لارې برید ترسره کړي خو د دې ډلې مشر مولانا خادم حسین او د هغه ۱۵۰ ملاتړي يې ونیول.
تېره اوونۍ د پاکستان د سُني تحریک په نامه سخت دریځه ډلې له پولیسو وغوښتل چې د پنجاب د وژل شوي والي ځوی شان تأثیر د کفر ویلو په تور ونیسي.
شان تأثیر د کرسمس په مناسبت له خلکو غوښتي وو چې هغو کسانو ته دعا وکړې چې د کفر ویلو د منع د قانون له مخې ورته سزا ورکړل شوې ده.
په پاکستان کې هرکال څه د پاسه سل کسان د کفر ویلو په تور محکومېږي خو تراوسه هېڅوک هم په دې برخه کې اشد مجازات یا اعدام شوی نه دی.
خو د رویټرز اژانس په وینا له ۱۹۹۰میلادي کال راهیسې په پاکستان کې د کفر ویلو د ادعا په قضیو کې لږترلږه ۶۵ کسان وژل شوي دي.