په کوټه کې د سړک غاړې د ښخ شوي ماين په چاودنه کې شپږ ملېشه سرتېري ټپيان شوي چې د يوه سرتېري حالت پهکې مرګونى ښودل کېږي.
د دوشنبې په غرمه د ملېشه ځواکونو ګزمه کوونکى موټر د کوټې ښار لوېديځ لور ته پر «بروري سړک» روان وو چې د سړک له غاړې ښخ شوى ماين ورباندې و چاودېد.
امنيتي پوليس او ملېشه سرتېري سمدستي د پېښې ځاى ته ورسېدل او په پېښه کې ټپي کسانيې د درملنې لپاره «ايف-سي» روغتون ته يووړل.
د ملېشه ځواکونو وياند رسنيو ته په لېږلې خبرپاڼه کې ويلي چې په موټر کې سپاره شپږ ملېشه سرتېري په چاودنه کې ټپيان شوي دي چې وايي په هغوى کې د يوه سرتېري حالت مرګونى دى.
د کوټې د پوليسو مشر عبدالرزاق چيمه د پېښې په ځاى کې رسنيو ته وويل، ناڅرګندو کسانو چې په کوم ځاى کې چاودېدونکي مواد ښخ کړي وو، دا د امنيتي سرتېرو د ډزو د زدهکړې لنډمهالى ځاى وو، ځکه نو امنيتي سرتېري مخکې له مخکې د امنيت لپاره نهو ګومارل شوي او وسلهوالو له موقعې څخه په استفادې سره ماين ښخ کړى وو.
چيمه وايي کله چې ملېشه سرتېري د ډزو کولو د روزنې لپاره دې ځاى ته ورسېدلي، همدغه مهال چاودنه شوې ده.
د پوليسو مشر په وينا دا چاودنه د ريموټ کنټرول په وسيله شوې چې وايي، له اتو تر لس کېلو ګرامه پورې چاودېدونکي مواد پهکې کارول شوي دي او د ملېشه ځواکونو موټر ته پهکې زيان رسېدلى دى.
د دې چاودنې مسؤليت تر اوسه کومې وسلهوالې ډلې نهدى منلى، خو په تېرو کلونو کې چې بلوچستان کې پر امنيتي سرتېرو بمي بريدونه شوي دي، مسؤليتيې د بلوڅو خپلواکي غوښتونکو سازمانونو او د پاکستاني وسلهوالو طالبانو بېلابېلو سازمانونو په غاړه اخيستى دى.
که څه هم د بلوچستان اوسنى حکومت په ايالت کې د بشپړ امنيت د ټينګښت ادعاوې کوي، خو پر دې برسېره د نوي ميلادي کال پر دوهمه نېټه پر امنيتي سرتېرو حمله وشوه.
د بلوچستان اعلى وزير نواب ثناءالله زيهري دا چاودنه په کلکه وغندله او رسنيو ته په لېږلې خبرپاڼه کې يې ويلي چې وسلهواليې ځپلي، ځکه اوس پر امنيتي سرتېرو ډارن بريدونه کوي.
رپوټ: بارکوال مياخېل
