د پاکستان سوات درې اوسېدونکي ویره لري چې پاکستاني طالبان ښايي بیا په دې سیمه کې خپل فعالیت پراخ کړي.
دا اندېښنې وروسته تر هغې زیاتې شوې چې د طالبانو یوه قوماندان له یوه دوکاندار څخه د پیسو غوښتنه وکړه.
د روان میلادي کال په اکتوبر میاشت کې د طالبانو یوه مهم قوماندان د سوات یوه دوکاندار عبد الرحیم ته زنګ ووهه او ورڅخه يې د پیسو غوښتنه وکړه.
دغه طالب قوماندان عبد الرحیم ته وویل چې دا پیسې د ده او نورو دوکاندارانو د ساتلو او له هغوی څخه د طالبانو د ملاتړ لپاره غواړي.
که څه هم عبد الرحیم د طالب قوماندان ملا اختر دا غوښتنه ونه منله، خو د سوات له دې دوکاندار څخه د طالبانو دې غوښتنې یو ځل بیا په سوات دره کې د طالبانو د فعالیت د پراخېدو په اړه اندېښنې پیدا کړي دي.
طالبانو په ۲۰۰۷ میلادي کال کې پر سوات درې دوه کاله سخت دریځه واک وچلوه او په ۲۰۰۹ کال کې د پاکستاني پوځ د عملیاتو په نتیجه کې له سوات څخه وتلو ته اړ شول.
خو ځای خلک وايي، طالبان اوس هم د سوات شااوخوا سیمو کې فعال دي.
پاکستان دا مهال په سوات دره کې شااوخوا ۴ زره سرتېري لري او په دې وروستیو میاشتو کې يې دغلته د دایمي اډو پر جوړولو هم پیل کړی دی.
که څه هم پاکستاني طالبانو په سوات کې کې د خپل فعالیت په اړه څه نه دي ویلي او نه هم سیمه اییزو مقاماتو په دې باب کومه تبصره کړې، خو ځايي خلک وايي، د روان میلادي کال له پیل راهیسې په وسله والو بریدونو کې زیاتوالی او له خلکو د پیسو غوښتنې دوی نا هیلي کړي دي.
رویترز اژانس وايي،د پاکستان پوځ د سوات د خلکو د ملاتړ او زړونو د ترلاسه کولو په هدف هڅه کوي چې په سوات کې ملکي ادارې جوړې او فعاله کړي.
تحریک طالبان پاکستان هم په سوات کې له ماتې وروسته په دې هڅه کې دي چې د دې درې اوسېدونکي له اډیالوژیک پلوه ځان ته راجلب کړي.
په ۲۰۰۹ میلادي کال کې د پاکستان پوځ وتوانید چې سوات په بشپړه توګه د تحریک طالبان پاکستان له فعالیت څخه پاک کړي.
د پوځ د مځکنیو او هوايې بریدونو په نتیجه کې شااوخوا دوه زره وسله وال له سوات پر شا شول او له پولې هغې غاړې ته د افغانستان په غرنیو سیمو کې ځای پر ځای شول.