د پاکستان د هوايي شرکت «PIA» یوه وړوکې يا فوكر الوتكه د خېبر پښتونخوا صوبې په حویلیا سیمه کې رالوېدلې ده.
د دې هېواد د دولتي هوايي شرکت «PIA» ادارې په دې په اړه یوې خپرې کړې خبرپاڼه کې ویلي چې دغه «ATR-42» ډوله الوتکه د چهارشنبې په ورځ تر غرمې وروسته د خېبر پښتونخوا له لیرې پرتې غرنۍ سیمې چترال څخه اسلاماباد ته روانه وه چې تر پرواز لږه شېبه وروسته په حویلیا نومي سیمه کې لویدلې ده.
د راپورونو له مخې، په دغې الوتکه کې ۴۲ مسافر او د عملې ۵ کارکوونکي سپاره و چې په دوی کې ښځې او ماشومان هم و.
د رسنیو د راپورونو له مخې، په دغې الوتکه کې د پاکستان پخوانی پاپ سټار سندرغاړی او اوسنی نعت ویونکی جنید جمشید او د هغه مېرمن هم وه.
د جنید جمشید ورور رسنیو ته ویلي چې هغه او مېرمنیې څو ورځې وړاندې د تبلیغ لپاره لیرې پرتې غرنۍ سیمې چترال ته تللي و.
د یادونې وړ ده چې د پاکستان د هوايي شرکت چارواکو لا تر دې دمه د دغې فوکر الوتکې د لوېدلو د علت او تلفاتو په اړه څه نهدي ویلي.
راپور: ذبیح مومند