د پاکستان د پنجاب صوبې «رحیمیار خان» ښار کې دوه بسونه ټکر شوي چې په نتیجه کې یې د ځايي چارواکو په وینا لږ تر لږه ۲۷ کسان مړه او ۶۶ نور ټپیان شوي دي.
د پنجاب صوبې د روغتيايي چارواکو په وینا، دا پېښه د دوشنبې په سهار د رحیمیار خان ښار "ریجا پاټک" ته څېرمه له کراچۍ نه د راتلونکي او فیصلاباد نه صادقاباد ته د تلونکي بس تر منځ رامنځته شوې ده.
د دوی په خبره، په مړو او ټپیانو کې ماشومان او مېرمنې هم شاملې دي او زیاتوي چې ټپیان د رحیمیار خان او خان پور روغتونونو ته وړل شوي چې د ډېرو روغتيایي حالت د اندېښنې وړ دی چې له املهیې ښایي د مړو شمېر پورته شي.
د پاکستان د جیو نیوز خبریال له شیخ زاید روغتون څخه چې د دغه ټکر ګڼ شمېر ټپیان او مړي ورته وړل شوي، د دغه روغتون د چارواکو په حواله د ټکر د وروستیو تلفاتو په اړه وویل:
"پر خان پور روډ د دوو بسونو د ټکر به نتیجه کې تر دې دمه ۲۷ کسان مړه شوي او ۶۶ ټپیان دي، خو ډاکټران تر ۲۰ زیاتو ټپیانو روغتيايي حالت مرګونی بولي او اندېښنه ښيي چې ښایي د مړو شمېر پورته شي."
که څه هم پاکستاني رسنۍ د بسونو په دغه ټکر کې د مړو شمېر ۲۷ ښیي، خو روېټرز خبري اژانس بیا د رحیمیار خان د پولیسو یوه مشر حسن اقبال په حواله وايي چې په دغه ټکر کې ۳۰ کسان مړه شوي او ۶۰ نور ټپیان دي.
تر اوسه پورې لا د پېښې لامل نهدی په ډاګه شوی، خو ژغورندویه ډلې او پولیس د پېښې ځای ته رسېدلي دي، څو د بسونو چتونه غوڅ کړي او مړي او ټپیان ترې راوباسي.
په پاکستان کې هر کال د موټرو او د مسافرو د بسونو ګڼ ټکرونه کېږي چې سلګونه کسانو ته مرګ ژوبله اړوي او لامليې د موټر چلوونکو بېغوري او همداراز د سړکونو خراب حالت ګڼل کېږي.
د پاکستان ولسمشر او د پنجاب صوبې وزیر اعلی شهباز شریف د پېښې په اړه خواشیني ښودلې، د ټپیانو د پوره درملنې امر یې کړی دی او همداراز يې د پېښې په اړه د بشپړ رپوټ چمتو کولو غوښتنه هم کړې ده.
د یادونې وړ ده چې په ۲۰۰۹میلادي کال کې هم د رحیمیار خان ښار همدې ریجا پاټک ته نېږدې دوه بسونه ټکر شوي و چې لږ تر لږه ۳۰ کسان پهکې مړه او ګڼ شمېر پهکې ټپیان شوي و.
راپور: ذبیح مومند
