د امریکا د ولسمشرۍ په انتخاباتو کې جمهوري غوښتونکی کاندید ډونالډ ټرمپ د یکشنبې په ورځ د اسرائیلو له صدراعظم بنیامین نتنیاهو سره په لیدنه کې ژمنه وکړه چې که ولسمشر شي نو بیتالمقدس به د اسرائیلو د نهوېشل کېدونکي پایتخت په توګه په رسمېت وپېژني.
د اسرائیلو صدراعظم بنیامین نتنیاهو چې د ملګرو ملتونو په عمومي اسامبله کې د ګډون لپاره په نیویارک کې دی، د یکشنبې په ورځ د امریکا د ولسمشرۍ په انتخاباتو کې له جمهوري غوښتونکي کاندید ډونالډ ټرمپ سره کتلي دي.
د ډونالډ ټرمپ انتخاباتي کمپاین په یوې خبرپاڼه کې ویلي:
"ټرمپ تصدیق کړه چې بیتالمقدس له درې زرو کلونو راهیسې د یهودو تلپاتی پایتخت دی او د ټرمپ تر مشرۍ لاندې د امریکا حکومت به بیتالمقدس د اسرائیل دولت د نهوېشل کېدونکي پایتخت په توګه په رسمیت وپېژني."
اسرائیل په ۱۹۶۷ میلادي کال کې د اسرائیلو او عربو د جګړې پر مهال ختیځ بیتالمقدس ونیوه، په ۱۹۸۰ میلادي کال کې یې له اسرئیلو سره یوځای کړ او اعلانیې وکړ چې ټول بیتالمقدس د اسرائیلو پایتخت دی.
د امریکا متحده ایالتو او د ملګرو ملتونو ډېرو غړو هېوادونو، د ختیځ عرب بیتالمقدس دا یوځای کول په رسمیت نهدي پېژندلي.
د امریکا کانګرس د ۱۹۹۵ میلادي کال په اکټوبر کې یو قانون تصویب کړ چې پهکې غوښتنه شوې چې بیتالمقدس دې نهوېشل کېدونکی او د اسرائیلو د پایتخت په توګه په رسمیت وپېژندل شي.
همدارنګه کانګرس له تلبیب څخه بیتالمقدس ته د امریکا سفارت د انتقال لپاره بودجه هم ځانګړې کړې وه.
خو له هغې راوروسته، نه د امریکا جمهوري غوښتونکي او نه کوم ډموکراټ ولسمشر دا قانون عملي کړ.
د نتنیاهو دفتر د دې یو ساعته لیدنې په اړه اعلامیه خپره کړې، خو د بیتالمقدس په اړهیې د ډونالډ ټرمپ د تعهد یادونه نهده کړې.
په دې اعلامیه کې ویل شوي:
"صدر اعظم بنیامین نتنیاهو له ښاغلي ټرمپ سره د اسرائیلو د امنیت اړوند مسئلو او په منځني ختیځ کې د ثبات لپاره د دې هېواد پر هڅو خبرې کړې دي."
خو د ټرمپ اعلامیه وايي چې نوموړي د اسرئیلو له صدراعظم سره ژمنه وکړه چې که ولسمشر وټاکل شي له اسرائیلو سره به له ستراتیژیک اړخه او همدارنګه د ټیکنالوژۍ او پوځي پلوه فوقالعاده همکاري وکړي.
ټرمپ همدارنګه اسرائیل د اسلامي افراطي ترهګرۍ پر ضد مبارزه کې د امریکا د متحده ایالتو مهم همکار بللی دی.
نوموړی همدارنګه د اسرائیلو له صدراعظم سره په لوېدیځه غاړه کې د جوړ کړي دېوال په امنیتي ګټو او له دې درکه د اسرائیلو په تجربه هم غږېدلی.
ټرمپ هم د امریکا او مکسیکو پر پوله د دېوال جوړول د خپل انتخاباتي کمپاین مهمه ژمنه ګرځولې ده.
د امریکا د ولسمشرۍ انتخاباتو ډموکراټې کاندیدې هیلري کلېنټن هم د نیویارک په یوه هوټل کې د اسرائیلو له صدراعظم سره کتلي دي.
د نوموړې کمپاین په یوې خبرپاڼه کې ویلي چې مېرمن کلېنټن له نتنیاهو سره د دوو هېوادونو ترمنځ پر ستراتیژیکو ګټو خبرې کړي او همدارنګهیې ټینګار کړی چې ولسمشرۍ ته د رسېدو په صورت کې به د اسرائیلو سره د امریکا هغه پوځي مرستې نورې هم زیاتې کړي چې په دې وروستیو کې یې د امریکا حکومت ژمنه کړې.
د کلېنټن کمپاین اعلامیه دا هم وايي چې دواړه هېوادونه به شریک کار کوي چې له ایران سره شوې اتمي موافقه عملي کړای شي.
د امریکا د ولسمشرۍ د څوکۍ دواړه کاندیدان په داسې حال کې د اسرائیلو له صدراعظم سره ګوري چې په دې وروستیو کې واشېنګټن په لوېدیځه غاړه او ختیځ بیتالمقدس کې د اسرائیلو لهخوا د یهودي مېشت ځایونو پر جوړولو انتقادونه زیات کړي او خبرداری یې ورکړی چې دا کار به له فلسطینیانو سره د سولې هیلې لهمنځه یوسي.
