د پاکستان دولتي مقاماتو هغه راپورونه رد کړل چې ګنې د دې هېواد په شمالي سيمې ګلګت بلتستان کې د پاکستاني پوځ يوه هليکوپټره چې بهرني ډيپلوماټان په کې ناست وو؛ ترهګرو وېشتې، بلکې دوى دا پېښه يوه "ناڅاپي حادثه" وبلله.
دوى وايي چې د لوېدلې هلیکوپټرې تور بکس يې موندلى چې په ترڅ کې يې معلومه شوې چې د دغه MI-17 ډوله الوتکې انجن کار پرېښى و چې له امله يې پر يوه ښوونځي نسکوره شوه.
دا څرګندونې د پاکستان د بهرنيو چارو د وزارت سکرتر اعزاز احمد چوهدري د شنبې په شپه ناوخته په اسلام اباد کې يوې خبري غونډې ته په وينا وکړې.
نوموړي دغه خبري غونډه تر هغې وروسته رابللې وه چې د جمعې په ورځ د پاکستان په ګلګت بلتستان کې د پوځ يوه هليکوپټره ولوېده چې په نتيجه کې یې د درېیو پيلوټانو، په دې هېواد کې د ناروې او فليپين د سفيرانو او د انډونيزيا و ملايزيا د سفيرانو د مېرمنو په ګډون ٧ کسان مړه او ١٣ نور ټبيان شول.
دا پېښه هغه مهال رامنځته شوه چې د پاکستان صدراعظم نواز شريف او په دې هېواد کې مېشتو د ځينو بهرنيو هېوادونو شاوخوا ٣٠ ډيپلوماټان په ګلګت کې د سکي لپاره د نویو جوړو شويو تاسيساتو د پرانېستلو په مراسمو کې د ګډون لپاره د ګلګت بلستان غرنۍ سيمې "نلتر" ته روان وو.
د پاکستاني رسنيو د راپورونو له مخې د دې پېښې مسووليت وسله والو طالبانو منلى او ويلي يې وو چې غوښتل يې د دې هېواد صدراعظم نواز شريف ووژني؛ خو اعزاز چوهداري دا تشې اوازې وبللې او ويې ويل چې دغه هلیکوپټره د تخنيکي ستونزې له امله لوېدلې ده:
"دا کومه ترورېستي پېښه نه، بلکې تخنيکي مساله وه چې له امله يې دا هليکوپټر ولوېده. موږ د دغې چورلکې تور بکس موندلى چې په نتيجه کې يې معلومه شوې چې د لوېدو پر مهال د دغې الوتکې انجن کار پرېښى و."
د اعزاز چوهدري په خبره؛ په دغې هلیکوپټرې کې ټولټال ١٩ کسان ناست وو چې ډېرى بهرني ډيپلوماتان وو.
په ټپيانو کې د پولنډ، هالنډ، جنوبي افريقا، انډونيزيا، لبنان، سويډن او رومانيه د سفيرانو په ګډون ٨ تنه بهرنيان دي چې د ګلګت بلتستان پوځي روغتون ته لېږدول شوي دي.
د اعزاز احمد چوهدري په وينا؛ په دغو ټپيانو کې يواځې د انډونيزيا د سفير روغتيايي حالت د اندېښنې وړ دى؛ ځکه چې د هغه د بدن ٧٥ سلنه برخه سوځېدلې ده.
هغه همداراز وويل چې د دغې پېښې د پلټنې لپاره يې يوه کمېټه جوړه کړې چې پر کار يې پيل کړى دى.
په ګلګت کې د هليکوپټر تر لوېدو وروسته د پاکستان صدراعظم نوازشريف سيمې ته سفر لغوه کړ؛ له نيمې لارې بېرته اسلام اباد ته ستون شو او د پېښې په وير يې يو ورځنى ملي ماتم اعلان کړ.
د يادونې وړ ده چې د پاکستان صدراعظم او د دې هېواد نورو سياستوالو د هليکوپټرې په لوېدو او په دې کې د بهرنيانو په مړينې خواشيني ښودلې او اړوندو ادارو ته يې د ټپيانو د ښې درملنې لارښوونه کړې ده.
راپور: ذبيح شفق