Күлкү кербени

* * * * *

Албетте, сизде сөз эркиндиги деген укук бар, бирок жемкордугубуз жөнүндө өтө эле көп фактыны билчү болсоңуз, анда оозуңузду төөнөп коюуга биз да эркинбиз.

* * * * *

Демократиянын туулган жери –– байыркы Грекия болгонун билебиз, бирок анын өлгөн жери –– ошончо мамлекеттин ичинен биздин өлкө болуп калгандыгы өкүнтөт.

* * * * *

–– Жолдош Иванов, деги өзүңүздө, мындайча айтканда, өз алдыңызча пикириңиз барбы?

–– Албетте, бар, жолдош парторг. Бирок мен андай бейбаш пикирлерди таптакыр колдобоймун.

* * * * *

–– Деги демократия эмне экенин түшүнөсүзбү?

–– Ооба. Бул –– иш-аракеттен –– сөздүн эркиндиги, абийирден –– иш-аракеттин эркиндиги жана өкүнүүдөн –– абийирдин эркиндиги.

* * * * *

Дагы караңыз

1937: Саясий анекдотсуз абак болгон эмес дешет

* * * * *

–– КМШ өлкөлөрүндө сөз эркиндиги калыптанды. Мисалы, ар ким эле өзүнүн журт башчысы тууралуу кашкайган чындыкты айта алат, бирок ал мындай сындан соң эч кандай кесепетке кабылбайт.

–– Болуптур, ага эч залал тийбейт дейлик, бирок берки сын айткандын тагдыры кандай болот?

* * * * *

Ооба, ушул өлкөдө сөз эркиндиги бар экени шексиз, бирок эркин сүйлөп алгандыгыңыз үчүн эркиндикте кала беришиңизге ким кепил боло алат?

* * * * *

(TT)

* * * * *

–– Түркмөнстанда таажы вирусу расмий түрдө четке кагылган соң, карапайым калайык жаңы илдетти ГБВ деп атай башташыптыр.

–– Кандай чечмеленет экен?

–– Гурбангулы Бердымухамедов вирусу деп...

* * * * *

–– Карантин маалында үйдө кийгенге пижама ыңгайлуу, бирок жынсы шымдан өтөөрү жок.

–– Эмне үчүн андай?

–– Толуп кеткениңди кайсы кийим менен тагыраак ченейсиң, ошону айтам.

* * * * *

–– Берекем, бурчтагы дүкөнгө чуркап барып келе калчы!...

–– Билди-им!.. Көрсө биздин үй-бүлөбүздө эч ким аябай турган жан мен турбаймынбы!..

* * * * *

–– Карантин маалында социалисттер менен коммунисттер көбөйө түшөт экен деген чынбы?

–– Албетте! Бош убакыт көп болгон соң, кошуна олигархтан тартып Билл Гейтске чейин байлыгын кантип топтошкону тууралуу жоромол кылууга кеңири мүмкүнчүлүк жаралат тура.

* * * * *

Дүкөндө кезекте эптеп алдыга суурулуп чыгуу үчүн айлакер жигит катуу чүчкүрдү да, баарына угуза бакылдады:

–– Шайтан алгырдыкы! Каяктан да Ухан деген шаарга бара калдым эле?!.

–– Биз да ошояктан бир аба каттамы менен чогуу учуп келдик! Шүк тур!.. –– деп кезектегилер жаалап кыйкырып жиберишти

* * * * *

–– Таажы вирусунун кандай түрлөрү бар экен?

–– Кытайдан, Италиядан, умрадан, пакистандык дааваттан, эми болсо той-тороподон чыкканы бар экен...

Дагы караңыз

Карантин –– каран түн эмес

* * * * *

Көркөм тасмалардын жана көркөм чыгармалардын аталыштары менен байланыштуу азилдерден.

“Таажы вирусунун айынан...”

Бул сөз айкашына эми чыгарманын аталышын кошо бериңиз:

“Үйдө жалгыз”;

“Жазз тобунда жалаң кыздар”;

“Сынган кылыч”;

“Жыгылган ооганга күлөт”;

“Кутуда калган киши”;

“Италиялыктардын Орусиядагы укмуштуу окуялары”; ж.б.

* * * * *

(TT)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.