Маектешкен Жазгүл Жамангулова, Чүй Максим Кулешовду коомчулуктун калың катмары адам укугун коргоо жаатындагы иш-аракеттери, көп өткөрүлүп турган акциялары менен тааныйт. “Азаттык” үналгысынын кабарчысы Жазгүл Жамангулова укук коргоочу Максим Кулешовду кепке тартып, анын кыялдары, болочок пландары жана Кыргызстандагы адам укугу тууралуу суроолорду узаткан.
Президенттин бир тууган иниси Жаныш Бакиевдин уулу Асылбек Салиев “Де-факто” жана “Алиби” гезиттерин “Ар-намысыма жана атуулдук абийириме шек келтирди” деп сотко берди. Аты аталган гезиттер 2007-жылдын 21-мартында Асылбек Салиев 27 жаштагы Акбар Молдокуловду машине менен коюп кеткен болушу ыктымалдыгын баяндаган макала басып чыгышкан. Эми президенттин иниси сотто эки гезиттен жалган жалаа жапты деп 1 миллион сомдон, ал эми макаланын авторлорунан 500 миң сомдон талап кылары айтылууда. Ал эми гезит жетекчилери алар баскан макалада эч кандай бирөөнүн ар-намысына шек келтирген сөздөр жоктугун, бул жөн гана кысым болушу ыктымалдыгын айтып жатышат.
Бүгүн түшкү саат 13:00дө укук коргоочу Максим Кулешов Борбордук шайлоо комиссиясынын алдында “Мен ишенгим келет!” деген аталыштагы нааразычылык иш-чарасын өткөрдү. “Айлананы караңгылык каптады, андан жарык таап чыгып кетүү зарыл” деген М.Кулешов БШКнын алдына “үмүт шамдарын” жагып жаткан жеринен аны милиция кармап кетти. Биринчи май райондук ички иштер бөлүмүнүн кызматкерлери аны көпкө кармабай бошотуп жиберишти. Анткени, райондор аралык сот бүгүн укук коргоочулардын шаардык кеңештин токтомуна каршы арызын канааттандырып, андагы шаар ичинде митинг-акцияларды өткөрбөө керектиги айтылган маселени тактап берүүсү үчүн конституциялык сотко жолдогон. Укук коргоочулар мунун туура чечим болгонун айтышууда.
Маектешкен Замира Кожобаева, Бишкек Улуттук телерадиокорпорациясынын жетекчисинин милдетин аткаруучу Мелис Эшимкановду кызматтан кетирүү талабы менен 31-январда айрым кызматкерлер ачкачылык чарасын башташкан. Ошондой эле Мелис Эшимкановдун УТРКга жетекчилик кызматка келгенине 100 күн болду. Кабарчыбыз Замира Кожобаева УТРКны реформалоо ишинин жүрүшү, Улуттук телеканалдын маалыматтарды чагылдыруудагы мындан аркы саясаты боюнча Мелис Эшимканов менен маектешкен.
Айгүл Жунушалиева, Бишкек 31-январда Биринчи Май райондук сотунда ”Мен ишенбейм...” акциясынын 6 мүчөсүнүн иши каралды. Парламенттик шайлоонун тыянактарына нааразы болгон “Мен ишенбейм...” кыймылынын 11 мүчөсүн 28-январда Жогорку Кеңештин алдынан милиция кармап, иштерин сотко берген. Аларга “нааразылык акцияларын өткөрүү эрежелерин бузду, милицияга каршылык көрсөттү” деген айыптар тагылган.
29-январда Жалалабатта облустагы жалгыз көз каранды эмес телеканал болуп саналган “Сентябрь” сыналгысынын мунарасына байланыштуу соттун экинчи олтуруму болду. Сот иши Сузак райондук архитектура башчысы келбегендиги менен Каралма токой чарбасынын башкы токойчусун чакыртууга жана сыналгыга берилген жердин картасы жоктугуна байланыштуу 6-февралга жылдырылды. Соттун улам артка жылдырылышын сыналгынын түштүк аймагындагы деректири Асылбек Текебаев аны саясий оюн катары бааласа, карапайым жарандар бийлик соттун колу менен эркин сыналгыны жабууга аракет кылып жаткандыгын белгилешти. Облбийликтин маалымат кызматы мындай айыптоолорду четке какты.
Гүлайым Ашакеева, Бишкек Кыргызстандык укук коргоочулар өлкөдөгү массалык камоолор боюнча БУУга кайрылуу жолдошту. Алар атуулдарды себепсиз камоо, кыйноо жана башка орой мамилелердин болуп жактандыгын күбөлөндүргөн кат жолдоо менен Улуттар уюмунун эки докладчысын Кыргызстанга чакырып, бул маселе боюнча өлкө жетекчилиги менен биргелешип, иштешүү зарылдыгын белгилешүүдө.
“Азаттыктын” таңкы уктурууларынын маектеши “Жарандар коррупцияга каршы” уюмунун жетекчиси Төлөйкан Исмаилова болду.
Бүгүн - 11-январда Жалалабатта Аксы окуясы боюнча сот иши улантылды. Анда экс-депутат Азимбек Бекназаров көрсөтмө берип, мурдагы жана азыркы президенттер Акаев, Бакиев баштаган бийлик, прокуратура, ички иштер кызмат башчылары суралганда гана бул окуя аягына чыгаарын билдирди. Облустун мурдагы прокурору Зоотбек Кудайбергенов Азимбек Бекназаровдун мындай көрсөтмөлөрүн божомол деп баалады.
“Азаттыктын” таңкы уктурууларынын кезектеги маектеши “Де факто” гезитинин негиздөөчүсү Чолпон Орозобекова болду.
Парламенттик шайлоонун жыйынтыгына нааразы болгон жаштардын “Мен ишенбейм” каршылык акциясына чыккандар бүгүн маалымат жыйынын өткөрүштү. Төлөйкан Исмаилова, Назгүл Турдубекова баш болгон укук коргоочулардын жана жаш саясатчылардын айтымында шаардык кеңештин митинг акцияларды чектеген чечими Конституцияга кайчы келет. Андыктан, алар бийликтин мыйзамсыз аракеттерин ашкерелеген каршылык акцияларын токтотпой өткөрө беришмекчи.
Дагы жүктөңүз
