“Азаттыктын” Бишкектеги кабарчысы. 2011-жылы Мамлекеттик Ардак грамота менен сыйланган. Кыргыз улуттук университетинин филология факультетин аяктаган.
Кыргызстандагы бодо мал тукумунун асылдуулугу соңку жылдарда бир кыйла төмөндөп кетти. Окумуштуулардын айтымында, акыркы жылдары малдын эттүүлүгү жана сүттүүлүгү дээрлик 70-80% азайды. Ушул тапта бир катар мал чарбалары бодо мал тукумун асылдандыруу иштерин жүргүзүшүүдө. Апталык “Адам жана базар” аттуу экономикалык программабыздын бул жолку чыгарылышында Чүйдүн Панфилов районундагы Арстанбек Дүйшеев атындагы асыл тукум мал заводундагы малдын асылдуулугун арттыруу багытында жүргүзүлүп жаткан иштер тууралуу баяндалмакчы.
Бишкек шаар мэри шаарды жылытууну 1-ноябрдан тарта жүргүзүүнү баштоо тууралуу буйрукка кол койду. Өнөр жай, энергетика жана отун ресурстары министри буга чейин электр энергиясын маал-маалы менен өчүрүү жылуулук берүү башталгандан тарта токтотулаарын маалымдаган. Бирок ошол эле учурда айрым облустар мындай мүмкүнчүлүктөн сыртта калаары айтылып, электр энергиясын маал-маалы менен өчүрүү кыш бүткүчө улантылаары болжолдонууда.
Бүгүн парламенттеги социал-демократтар жана коммунисттер фракциялары суу-энергетика тармагын иликтөө боюнча көз карандысыз комиссия түзүү сунушу менен чыгышты. Бирок бул демилге “Ак Жол” фракциясынын мүчөлөрүнүн каршылыгы менен өтпөй калды. Өкмөт болсо өлкөдөгү энергетикалык кризиске карабай кышка даярдык жакшы жүрүп жаткандыгын белгилөөдө. Бирок ошол эле учурда 9,5 млрд метр куб гана суу бар Токтогул ГЭСинин абалы, отун-көмүрдүн баасы асмандап жаткан учурда кышка даярдыктын чыныгы деңгээли кандай, деген суроолор пайда болууда.
24-октябрда маркум журналист Алишер Саиповдун киши колдуу болуп өлтүрүлгөнүнө бир жыл болот. Кыргызстандагы журналист коомчулугу жыл аралыгында анын өлүмүнүн бети ачылбай келе жаткандыгына, өлкөдөгү сөз эркиндигинин абалы жылдан-жылга начарлап бараткандыгына тынчсызданышууда. Маркум журналисттин жакындары болсо Алишер Саиповдун өлүмү боюнча козголгон кылмыш ишинин жүрүшүн өз көзөмөлүнө алгандыгын билдирген президент Курманбек Бакиевден да эч кандай жооп болбогондугуна нааразылыгын билдирип келишет.
Акыркы айда Кыргызстандын азык-түлүк базарларында сүт азыктарынын баасы 20-30 пайызга кымбаттады. Байкоочулардын пикиринде мындан сүт азыктарын кайра иштетүүчүлөр гана пайда көрбөсө, малчылардын көргөн кирешеси аз.
10-октябрда Кыргызстандын Коопсуздук кеңешинин катчысы, “Жаңы Кыргызстан” саясий партиясынын төрагасы Исмаил Исаков кызматынан кетүүгө арызын берди. Ал бул кадамын президент Курманбек Бакиевдин ички, тышкы жана кадр саясаты менен макул эместигине байланыштырып, март ыңкылабынын алдына коюлган үмүт-максаттар ишке ашпай калгандыгын белгилеген. Саясий айдыңда Коопсуздук Кеңешинин мурдагы катчысынын мындай кадамы кызуу талкууга алынып, түрдүү пикирлерди жаратууда.
Расмий сапар менен келген Орусиянын президенти Дмитрий Медведев бүгүн Кыргызстандын президенти Курманбек Бакиев менен жолугушту. Жолугушуунун соңунда эки өлкөнүн ортосундагы саясий-экономикалык, маданий-гуманитардык жана башка багыттар боюнча эки тараптуу кызматташууларды өркүндөтүү тууралуу келишимдерге кол коюлду. Айрым саясат талдоочулар эки өлкө мамлекет башчыларынын буга чейинки жолугушуулары Кыргызстан үчүн пайдалуу боло бербегендигин, бирок бул жолу Орусия Борбор Азиядагы таасирин сактап калуу үчүн Кыргызстанга убада кылган экономикалык көмөгүн ишке ашыруусу ыктымалдыгын айтышууда.
Бүгүн “Америкалык базаны Кыргызстандан чыгаруу” кыймылы 9-10-октябрда Бишкекте өтө турган саммиттин катышуучуларына кайрылуу кабыл алып, алардан АКШнын аскерий аба базасын Кыргызстандан чыгаруу талабын өлкө бийлигине коюуну өтүнүштү. Ошондой эле бүгүн “Жоомарт” патриоттук кыймылы менен “Акыл-эс. Рух. Ыйман” коомдук бирикмеси да антитеррордук күчтөрдүн “Манас” аскерий аба базасы Кыргызстандан тез арада чыгып кетүүсү зарылдыгын белгилешти. Айрым саясат талдоочулар АКШ баштаган коалициялык күчтөрдү Кыргызстандан чыгарууга башка мамлекет башчылары таасир этүүгө укугу жоктугун айтышууда.
30-сентябрдан бери дайынсыз жок болуп жаткан ЖК депутаты Руслан Шаботоевди издөө иштери өтө начар, солгун жүрүп жатат, буга байланыштуу кылмыш иши да козголбоптур. Мындай маалыматты парламенттеги социал-демократтар фракциясынын лидери Бакыт Бешимов кечээ билдирди. Ал эми ИИМ басма сөз кызматы бул ишке байланыштуу кылмыш иши козголуп, тиешелүү адамдар көрсөтмө беришкендигин маалымдоодо. Жоголгон депутаттын жакындары кечээ коомчулукка кайрылуу таратып, Руслан Шаботоевди издөө иштери өтө солгун жүрүп жаткандыгына нааразылыгын билдиришкен эле.
Айрым бейөкмөт уюмдар жана оппозициялык партиялардын өкүлдөрү тарабынан бүгүнкү шайлоодо бурмалоолор болуп жаткандыгы айтылууда. Ал эми шайлоодо добуш берген мамлекет башчы Курманбек Бакиев бул жолку шайлоодо демейдегиден көп талапкерлер ат салышып жаткандыгын белгилеп, бүгүн шайланган жергиликтүү кеңештер эл үчүн кызмат кыларына ишенерин билдирди. Мындан тышкары Курманбек Бакиев БШКнын мурдагы төрайымынын билдирүүсү күтүүсүз болгондугун айтып, муну саясатчылар жергиликтүү кеңештерге шайлоонун алдында атайын жасашты, деген пикирин журналисттердин суроолоруна жооп берип жатып ачыктады.
Ушул тапта пахта терим кызуу жүрүүдө. Дыйкандар терип алган акбуласынын баасы өткөн жылга салыштырмалуу 5-6 сомго кымбат болгону менен, кеткен чыгашаны, тарткан мээнетти актабай жаткандыгына нааразылыгын билдирип жатышат.
Башкы прокуратура бүгүн БШКнын мурдагы төрайымы Клара Кабилованын видеокайрылуусунун негизинде козголгон кылмыш ишке ылайык Максим Бакиевди суракка алды. Клара Кабилова видеокайрылуусунда президенттин уулу коркутуп-үркүткөнү, орой сөздөр менен кемсинткени тууралуу билдирген эле. Максим Бакиев болсо ВРС маалымат агенттигине берген интервьюсунда бул ишке эч кандай тиешеси жоктугун маалымдады.
Башкы прокуратура БШКнын мурдагы төрайымы Клара Кабилованын кайрылуусуна байланыштуу кылмыш ишин козгоду. Башкы көзөмөл органынын башчысы Элмурза Сатыбалдиев бул ишке байланыштуу президенттин уулу Максим Бакиев менен президенттик администрациянын башчысы Медет Садыркулов да суралаарын билдирди. Ошондой эле бүгүн “Ата Мекен” партиясы БШКнын мурдагы төрайымынын кызматтан кетүү аракетин колдой тургандыгын маалымдаган билдирүү таратып, президент Курманбек Бакиев элдин кызыкчылыгынан үй-бүлөсүнүн кызыкчылыгын жогору койду, деп белгиледи.
Бүгүн Беларуста өтүп жаткан парламенттик шайлоого кыргызстандык саясатчылардын пикирлери ар түрдүү. Кээ бир саясатчылар Беларус президенти Александр Лукашенконун акыркы убактардагы оппозицияга жумшара баштаган мамилесин эске алуу менен бул жолку шайлоо мурдагыларга караганда адилет өтөрү бышык, деп эсептешет. Ошол эле учурда беларус бийлиги бул жолу шайлоону демократиялык принциптердин негизинде эмес, Батыш менен мамилесин жакшыртуу кызыкчылыгы үчүн гана акыйкат өткөрүшү мүмкүн, деген пикирлер да жок эмес.
Кыргызстанда көмүр эң арзан баада сатылып жаткан аймак - Нарындын Жумгал району. Бул жерде “кара алтындын” 1 тоннасы 1600 сомдон сатылууда. Ал эми Талас, Чүй, Ысык-Көл облустарында, Нарындын башка райондорунда көмүрдүн тоннасы 2,5 миң сомдон кем эмес. “Азаттыктын” экономикалык “Адам жана базар” программасынын бул жолку чыгарылышында Кыргызстандын түндүк аймактарындагы көмүр баасын, кышка даярдык тууралуу кеп болмокчу.
Бүгүн (18-сентябрь) “Бирдиктүү Кыргызстан” коомдук-саясий кыймылы өлкөнүн экономикалык абалы боюнча форум өткөрдү. Анда азык-түлүк коопсуздугу, энергетикалык кризис жана каржы системасы тууралуу маселелер козголду. Аягында өлкөдө түзүлүп жаткан экономикалык оор кырдаалдан чыгуу боюнча сунуштар кыргыз элине жана мамлекет башчысына жолдонду. Ошол эле учурда тегерек үстөлгө байкоочу катары катышкан айрым саясатчылар “Бирдиктүү Кыргызстан” кыймылы тарабынан уюштурулган бүгүнкү форумдун негизин көбүнчө өткөн чакты эңсөө түзгөнүн билдиришүүдө.
Быйылкы кышта газ Бишкекте үзгүлтүксүз берилет, ал эми анын баасы 1 кубометрине 13-14 сомго айлануусу мүмкүн. Бул тууралуу “Бишкек Газ” ишканасынын жетекчиси Алишер Бейшеналиев кечээ журналисттерге маалымдады. Анын айтуусунда, буга чейин болжолдонуп келгендей 2008-жыл үчүн көгүлтүр оттун баасы миң кубометрине 300 долларга чыгуусу ыктымал. Айрым адистер кыргыз өкмөтү газдын наркы тууралуу өзбек тарап менен тиешелүү деңгээлде сүйлөшүүлөрдү жүргүзө албаганы –карапайым калктын эле чөнтөгүн жукартып жаткандыгын белгилешет.
Мурдагы баш прокурор, экс-депутат Азимбек Бекназаров башында турган Революциялык комитет өлкөнүн расмий бийлигин Конституциялык жол менен токтоосуз түрдө тактан кулатууну көздөйт. Бул тууралуу Кыргызстан элине кайрылуусун ревкомдун жетекчиси бүгүн маалымат жыйынында ачыктады. Анын айтуусунда 2005-жылы март ыңкылабынан кийин бийликке келген Курманбек Бакиев мамлекетти башкара алган жок. Айрым саясатчылар эгерде ыңкылап болсо ал кандуу болуусу ыктымал деген кооптоонууларын айтышууда.
Маалымат каражаттарында айтылгандай, бүгүн “Акыйкат үчүн” кыймылынын алдында түзүлгөн Коомдук парламент кезектеги жыйынына чогулат. Анда өлкөдөгү экономикалык жана саясый кырдаалга, сөз эркиндиги жана адам укуктарынын абалына баа берилмекчи. Мындан тышкары жыйындын катышуучулары Кыргызстандын өнүгүү концепциясын талкууга алышат. Ошол эле учурда оппозициянын мындай аракеттеринен эч майнап чыкпастыгын белгилеген саясатчылар да бар.
“Алиби” гезитинин мурдагы баш редактору, учурда “Ачык саясат” гезитин чыгарып жаткан Бабырбек Жээнбековго белгисиз адамдар тарабынан коркутуп-үркүтүүлөр уланууда. Бул тууралуу ал бүгүнкү маалымат жыйынында билдирди. Ошондой эле “Ата Мекен” партиясы “Алиби” гезитинин мурдагы баш редактору, партиянын мүчөсү Бабырбек Жээнбековдун шаардык кеңештин депутаттыгына талапкер катары кол тийбестик макамына карабастан мыйзамсыз камакка алган милиция кызматкерлеринин ишине байланыштуу прокуратурага кайрылмакчы. Кепти кабарчыбыз Замира Кожобаева улантат.
Дагы жүктөңүз
